ارمەنيانىڭ سىرتقى ىستەر مينيسترلىگى رەسەيدىڭ ارمەنياداعى ەلشىسىن شاقىرىپ، رەسەيلىك مەملەكەتتىك باق پەن رەسمي تۇلعالاردىڭ ارمەنيا بيلىگىنە قاتىستى مالىمدەمەلەرىنە بايلانىستى قارسىلىق نوتاسىن تابىستادى، دەپ حابارلايدى "ادىرنا" ۇلتتىق پورتالى Armenpress اگەنتتىگىنە سىلتەمە جاساپ.
مينيسترلىك وكىلى اني بادالياننىڭ ايتۋىنشا، رەسەيلىك تەلەارنالاردا ارمەنيا ۇكىمەتىنە قارسى ءجيى ايتىلىپ جۇرگەن اشىقتان-اشىق دۇشپاندىق جانە كەي جاعدايدا جاۋلىق سيپاتتاعى ۇگىت-ناسيحات ارميان قوعامىنىڭ نارازىلىعىن تۋدىرعان.
نوتا مازمۇنى كوپشىلىككە اشىق تۇردە جاريالاندى. وندا ارمەنيا بيلىگىن قارالايتىن تىكەلەي ەفيردەگى قورلاۋ سيپاتىنداعى مالىمدەمەلەر مەن شابۋىلداردىڭ مۇلدە قابىلدانبايتىنى جانە بۇل ارەكەتتەر جۋىرداعى جوعارى دەڭگەيلى كەزدەسۋلەردىڭ وڭ ناتيجەلەرىنە نۇقسان كەلتىرەتىنى ايتىلعان.
سونداي-اق، رەسەيلىك بىرقاتار دەپۋتاتتاردىڭ ارمەنيادا «مەملەكەتتىك توڭكەرىس جاساۋعا تىرىستى» دەگەن كۇدىكپەن ۇستالعان تۇلعالارعا قاتىستى پىكىرلەرى دە سىنعا الىنعان. ارميان تاراپى مۇنى ەلدىڭ ىشكى ىسىنە ارالاسۋ جانە دەموكراتيالىق قۇرىلىمعا زيان كەلتىرۋگە باعىتتالعان ارەكەت رەتىندە باعالاپ وتىر.
ارمەنيا ءسىم رەسەي تاراپىن ارمەنياعا باعىتتالعان بۇل ءتارىزدى «دۇشپاندىق كورىنىستەردى» توقتاتۋعا ناقتى ءارى جەدەل شارالار قابىلداۋعا شاقىردى.
ايتا كەتەيىك، 25 ماۋسىم كۇنى ارمەنيادا بيلىكتى كۇشپەن باسىپ الۋدى جوسپارلادى دەگەن كۇدىكپەن بىرنەشە ادام، سونىڭ ىشىندە رەسەيلىك ميللياردەر سامۆەل كاراپەتيان ۇستالعان بولاتىن. بۇل وقيعا رەسەيدە ۇلكەن قوعامدىق رەاكتسيا تۋدىردى. ارمەنيانىڭ ءسىم باسشىسى ارارات ميرزويان بۇل رەتتە رەسەي ءسىم جەتەكشىسى سەرگەي لاۆروۆقا ارمەنيانىڭ ىشكى ىستەرىنە ارالاسپاۋ جونىندە ۇندەۋ جاساعان.
