قايرات ساتىبالدى ۇزاق ۋاقىتتان كەيىن العاش رەت كوپشىلىك الدىندا بوي كورسەتتى، دەپ حابارلايدى "ادىرنا" ۇلتتىق پورتالى.
ول باۋىرجان مومىشۇلى اتىنداعى اسكەري-سپورت كوللەدجىندە كۋرسانتتارمەن كەزدەسىپ، ەسكەرتكىشكە گۇل قويۋ راسىمىنە قاتىسقان. وچى ءساتتىڭ بەينەسى كوللەدج پاراقشاسىندا جاريالانعان.
ايتا كەتەيىك، قايرات ساتىبالدىۇلى — ب.مومىشۇلى اتىنداعى اسكەري-سپورت كوللەدجىنىڭ تۇلەگى.
قايرات ساتىبالدىۇلى — قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ نەمەرە ءىنىسى، بۇرىنعى ۇقك قىزمەتكەرى جانە گەنەرال-مايور. ول ءار جىلدارى استانا اكىمىنىڭ ورىنباسارى، «Kazakh Oil» ۇلتتىق كومپانياسىنىڭ ۆيتسە-پرەزيدەنتى، «قازاقستان تەمىر جولى» ۇلتتىق كومپانياسى» اق ءبىرىنشى ۆيتسە-پرەزيدەنتى جانە Nur Otan پارتياسىنىڭ حاتشىسى قىزمەتتەرىن اتقارعان. سونىمەن قاتار Forbes Kazakhstan تىزىمىندەگى ىقپالدى كاسىپكەرلەردىڭ ءبىرى رەتىندە تانىلعان.
2022 جىلى قايرات ساتىبالدىۇلى اسا ءىرى كولەمدە قارجى جىمقىرۋ جانە سەنىپ تاپسىرىلعان مۇلىكتى يەمدەنۋ كۇدىگىمەن ۇستالعان بولاتىن. كەيىن سوت ونى كىنالى دەپ تانىپ، مۇلكىن تاركىلەۋمەن بىرگە التى جىل باس بوستاندىعىن شەكتەۋ تۋرالى جازا تاعايىندادى.
دەگەنمەن، 2024 جىلى قىركۇيەكتە قايرات ساتىبالدى بوستاندىققا شىققان. سوت ونىڭ شارتتى تۇردە مەرزىمىنەن بۇرىن بوساپ شىعۋ تۋرالى ءوتىنىشىن قاناعاتتاندىرىپ، وتەۋى ءتيىس 3 جىل 3 اي مەرزىمدى الماتىدا، پروباتسيالىق باقىلاۋدا وتكىزەتىنى حابارلانعان.
سوت ۇكىمىنە دەيىن ەكس-پرەزيدەنت نۇرسۇلتان نازارباەۆتىڭ نەمەرە ءىنىسى قازاقستانعا جىمقىرعان 783 ملرد تەڭگەنىڭ اكتيۆتەرىن قايتارىپ، حالىق پەن پرەزيدەنتتەن كەشىرىم سۇراعان ەدى.
