ۆەنگريانىڭ جاڭا ۇكىمەتى "روساتومنىڭ" قاتىسۋىمەن جۇزەگە اسىرىلىپ جاتقان اەس قۇرىلىسى تۋرالى مالىمدەمە جاسادى، دەپ حابارلايدى "ادىرنا" ۇلتتىق پورتالى DW-عا سىلتەپ.
بۇل تۋرالى ەلدىڭ ەكونوميكا جانە ەنەرگەتيكا ءمينيسترى قىزمەتىنە كانديدات يشتۆان كاپيتان پارلامەنتتىك تىڭداۋ بارىسىندا مالىمدەدى.
ونىڭ ايتۋىنشا، جاڭا ۇكىمەت "پاكش-2» اتوم ەلەكتر ستانتسياسى جوباسىنىڭ قارجىلاندىرۋ تەتىكتەرى مەن كەلىسىمشارتتارىنىڭ شارتتارىن جان-جاقتى زەرتتەۋدى جوسپارلاپ وتىر. سونداي-اق كاپيتان ۆەنگريا ءۇشىن اشىق ءارى ايقىن يادرولىق ستراتەگيانىڭ ماڭىزىن اتاپ ءوتتى.
9 مامىردا قىزمەتىنە كىرىسكەن ۆەنگريا پرەمەر-ءمينيسترى پەتەر ماديار بۇعان دەيىن دە «پاكش-2» جوباسىنا قاتىستى بارلىق كەلىسىمدەردى تەكسەرۋگە دايىن ەكەنىن ايتقان. ونىڭ پىكىرىنشە، جوبانىڭ قۇنى نەگىزسىز جوعارى بولۋى مۇمكىن.
ۆەنگريا مەن رەسەي اراسىنداعى اتوم ەلەكتر ستانتسياسىن كەڭەيتۋ تۋرالى كەلىسىم 2014 جىلى تەندەر وتكىزىلمەستەن جاسالعان. قۇنى 12,5 ملرد ەۋرو بولاتىن جوبا اياسىندا «پاكش» ستانتسياسىندا رەسەيلىك ەكى ۆۆەر رەاكتورىن سالۋ كوزدەلگەن.
جوبا بىرنەشە رەت كەيىنگە قالدىرىلعان. 2024 جىلى اقش اكىمشىلىگى «پاكش-2» قۇرىلىسىنا سانكتسيا ەنگىزگەنىمەن، 2025 جىلى بۇل شەكتەۋلەردىڭ كۇشى جويىلدى. سونىمەن قاتار، 2025 جىلدىڭ قىركۇيەگىندە ەۋرووداق سوتى ۆەنگريانىڭ جوباعا قارجىلاي قاتىسۋىنا رۇقسات بەرگەن ەۋروكوميسسيا شەشىمىنىڭ كۇشىن جويعان.
سوعان قاراماستان، 2026 جىلدىڭ اقپانىندا جاڭا ەنەرگوبلوكتاردىڭ قۇرىلىسى باستالىپ، روساتوم رەاكتور ىرگەتاسىنا العاشقى بەتون قۇيىلعانىن حابارلادى.
