قازاقستان مەكتەپتەرىندە قوجا احمەت ءياساۋيدىڭ رۋحاني مۇراسىنا ارنالعان «ياساۋيتانۋ» ءپانى ەنگىزىلدى. بۇل تۋرالى Jibek Joly تەلەارناسى جاريالادى، دەپ حابارلايدى “ ادىرنا”..
ۇكىمەت ءياساۋيدىڭ ەڭبەكتەرىن زەرتتەۋ مەن ناسيحاتتاۋعا، سونداي-اق تۇركىستان قالاسىن رۋحاني تۋريزم ورتالىعى رەتىندە دامىتۋعا باعىتتالعان 37 ءىس-شارانى قامتيتىن ارنايى جوسپاردى بەكىتتى.
قازىرگى تاڭدا بۇل قوسىمشا ءپان ەلدەگى 36 وقۋ ورنىندا وقىتىلىپ جاتىر. وقۋشىلار ءياساۋيدىڭ ءومىر جولىن، ونىڭ حيكمەتتەرىن، فيلوسوفيالىق جانە ادامگەرشىلىك يدەيالارىن مەڭگەرەدى.
سونىمەن قاتار، قوجا احمەت ياساۋي كەسەنەسى اۋماعىندا عىلىمي-رەستاۆراتسيالىق جۇمىستار جۇرگىزۋ جانە جاڭا تۋريستىك باعىتتار اشۋ جوسپارلانعان.
ودان بولەك، ياساۋي جىلىن يۋنەسكو دەڭگەيىندە جاريالاۋ باستاماسى قاراستىرىلىپ جاتىر. بۇل ونىڭ مۇراسىن حالىقارالىق دەڭگەيدە ناسيحاتتاۋعا مۇمكىندىك بەرەدى دەپ كۇتىلۋدە.
ياساۋيتانۋ عىلىمي ورتالىعىنىڭ قىزمەتكەرى باۋىرجان بوتاقاراەۆتىڭ ايتۋىنشا، كۋرس زايىرلى فورماتتا وقىتىلادى.
«مەكتەپ – زايىرلى مەكەمە. مۇندا قانداي دا ءبىر دىنگە ارتىقشىلىق بەرىلمەيدى جانە بەلگىلى ءبىر كوزقاراستار سىنعا الىنبايدى. قوجا احمەت ءياساۋيدىڭ ءىلىمى وبەكتيۆتى تۇردە وقىتىلادى. كۋرستىڭ نەگىزىنە قازاقتىڭ سالت-ءداستۇرى، ار-وجدان بوستاندىعى، ابىروي، قادىر-قاسيەت جانە ادامگەرشىلىك سەكىلدى قۇندىلىقتار ەنگىزىلگەن»، – دەدى ول.
