سەنبى، 10 تامىز كۇنى يزرايل قورعانىس كۇشتەرى (IDF) گازا سەكتورىنداعى ءال-تابين مەكتەبىنە اۋەدەن سوققى جاسادى، - دەپ حابارلايدى “ادىرنا” ۇلتتىق پورتالى DW باسىلىمىنا سىلتەمە جاساپ.
IDF ايتۋىنشا، عيماراتتا يزرايلگە شابۋىلدار جوسپارلانعان پالەستينالىق حاماس قوزعالىسىنىڭ باسقارۋ ورتالىعى ورنالاسقان. حابارلامادا كوماندالىق پۋنكتتىڭ تابىلعانى، شابۋىلدىڭ اقش پەن ءيزرايلدىڭ بارلاۋ قىزمەتتەرىمەن ۇيلەستىرىلگەنى اتاپ ءوتىلدى. سونىمەن بىرگە، مەكتەپ عيماراتىنىڭ جانىندا ورنالاسقان مەشىت گازا قالاسىنىڭ تۇرعىندارى ءۇشىن باسپانا رەتىندە قىزمەت ەتەدى، دەپ حابارلادى يزرايل ارمياسى.
«شابۋىلعا دەيىن بەيبىت تۇرعىنداردى قورعاۋ ءۇشىن بىرنەشە قادامدار جاسالدى. ونىڭ ىشىندە وق-دارىلەردى اۋەدەن باقىلاۋ جانە بارلاۋ شارالارى جۇرگىزىلدى»، - دەلىنگەن حابارلامادا.
IDF «حاماس حالىقارالىق قۇقىقتى جۇيەلى تۇردە بۇزدى جانە ازاماتتىق ورىندارعا ارەكەت ەتەدى، بەيبىت تۇرعىندار مەن مەكەمەلەردى ءوزىنىڭ لاڭكەستىك ارەكەتتەرى ءۇشىن ءتىرى قالقان رەتىندە اياۋسىز پايدالانادى» دەپ قوستى.
كاتار تەلەارناسى Al Jazeera مەن Al-Mayadeen تەلەارناسىنىڭ حابارلاۋىنشا، سوققى سالدارىنان كەمىندە 100 ادام قازا تاۋىپ، ونداعان ادام جارالانعان. پالەستينالىق WAFA اقپارات اگەنتتىگىنىڭ حابارلاۋىنشا، مەكتەپتە سوعىستىڭ سالدارىنان باسپانالارىن تاستاپ كەتۋگە ءماجبۇر بولعان پالەستينالىقتار بولعان. كۋاگەرلەردىڭ سوزىنشە، سوققى ەسكەرتۋسىز سەنبى كۇنى كۇن شىقپاي تۇرىپ جۇرت ناماز وقىپ جاتقان شاقتا جاسالعان. عيماراتقا ەكى راكەتا تۇسكەن دەپ ايتىلادى.
يزرايل ارمياسىنىڭ وكىلى ءوز كەزەگىندە شابۋىل ناتيجەسىندە «20-عا جۋىق سودىردىڭ» ولتىرىلگەنىن ايتتى. ونىڭ ايتۋىنشا، حاماس تاراتقان اقپارات IDF دەرەكتەرىنە سايكەس كەلمەيدى جانە سوققى تۇرىنە جانە قولدانىلعان زىمىرانداردىڭ دالدىگىنە جاناسپايدى.
