جەتىسۋ وبلىسىندا تۇڭعىش رەت جاڭا، زاماناۋي، ەكى قاباتتى كىتاپحانا عيماراتى ارنايى سالىنىپ، قولدانىسقا بەرىلدى. جوبا مەملەكەت باسشىسىنىڭ تاپسىرماسىنا سايكەس ىسكە اسىرىلدى. كەربۇلاق اۋدانىنىڭ سارىوزەك اۋىلىندا ورنالاسقان كىتاپحانانىڭ اشىلۋىنا وبلىس اكىمى بەيبىت يساباەۆ قاتىستى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
اۋدان تۇرعىندارىن جاڭا نىساننىڭ اشىلۋىمەن قۇتتىقتاعان وبلىس باسشىسى اۋىلدىق ەلدى مەكەندە زاماناۋي جاڭا كىتاپحانانىڭ اشىلۋى جەتىسۋ ءوڭىرىنىڭ رۋحاني ومىرىندەگى ايتۋلى جاڭالىق ەكەنىن اتاپ ءوتتى.
- بۇل – كىتاپ وقۋ مادەنيەتىن دامىتۋ جانە زاماناۋي كىتاپحانا كەڭىستىكتەرىن قالىپتاستىرۋ تۋرالى مەملەكەت باسشىسىنىڭ تاپسىرماسىن وڭىردە ىسكە اسىرۋدىڭ العاشقى باستاماسى. جاڭا كىتاپحانادا كىتاپ وقۋعا عانا ەمەس، تسيفرلىق رەسۋرستاردى پايدالانۋعا، جان-جاقتى ىزدەنۋگە، ءتۇرلى مادەني جانە قوعامدىق ءىس-شارالار وتكىزۋگە بارلىق جاعداي جاسالعان. كىتاپحاناعا سالىنعان ينۆەستيتسيا – ەڭ الدىمەن ادام كاپيتالىنا، ۇلتتىڭ ينتەللەكتۋالدىق الەۋەتىنە جاسالعان ينۆەستيتسيا. بۇل رەتتە وسى كيەلى وردادان ءبىلىمدى، سانالى، تاربيەلى، كىتاپسۇيەر ۇرپاقتىڭ قالىپتاسىپ شىعاتىنىنا سەنىمدىمىز. جاڭا نىسان وسىنداي يگى ماقساتتارعا قىزمەت ەتىپ، ءوڭىردىڭ رۋحاني شامشىراعىنا اينالسىن! – دەدى ب. يساباەۆ.
مۇنان سوڭ جينالعان كوپشىلىك كىتاپحانانىڭ ءىشىن ارالاپ كوردى. سونىڭ ىشىندە ءماجىلىس زالىن، وقۋ زالىن جانە بالالار ءبولىمىن ارالاپ كوردى.
كىتاپحانا ديرەكتورى گۇلميرا احانقىزىنىڭ ايتۋىنشا، جاڭا كىتاپحانانىڭ كىتاپ قورى 53 مىڭنان اسادى. عيماراتتىڭ باستى ەرەكشەلىگى - مۇندا بىرنەشە وقىرمان زالىنىڭ بولۋى، اتاپ ايتقاندا مەكتەپ جاسىنا دەيىنگى، مەكتەپ جاسىنداعى بالالارعا، ەرەسەكتەرگە ارنالعان ارنايى وقىرمان زالدارى قاراستىرىلعان. سونىمەن قاتار مەدياتەكاسى بار اقپاراتتىق-انىقتامالىق زال، كوبەيتۋ زەرتحاناسى، اۋقىمدى كىتاپ قويماسى ورنالاسقان. قازىرگى تاڭدا كىتاپحانا وقىرماندارىنىڭ سانى شامامەن 5570 ادام.
جاڭا كىتاپحانا عيماراتىنىڭ اۋماعى 1620 شارشى مەتر. كىتاپحانادا وقىرماندارعا قولايلى جاعداي جاسالىپ، زاماناۋي تالاپتارعا ساي جابدىقتالعان.
ءبىرىنشى قاباتتا كىتاپحانانىڭ نەگىزگى قىزمەتتىك جانە وقۋ زالدارى ورنالاسقان. مۇندا كىتاپ قورىن زاماناۋي تالاپتارعا ساي ساقتاۋعا جانە وقىرماندارعا ەلەكتروندى فورماتتا ۇسىنۋعا مۇمكىندىك بەرەتىن سكانەرلەۋ جانە تسيفرلاندىرۋ كابينەتى بار. سونداي-اق كومپيۋتەرمەن جانە ينتەرنەتپەن جابدىقتالعان مۋلتيمەديا زالى جۇمىس ىستەيدى. E-gov پورتالى ارقىلى وزىنە-ءوزى قىزمەت كورسەتۋ بۇرىشى قاراستىرىلعان.
- بىرەگەي زالداردىڭ ءبىرى – 30 ورىندىق ولكەتانۋ زالى. مۇندا ولكەنىڭ تاريحى مەن مادەنيەتى، كەربۇلاق اۋدانىنان شىققان بەلگىلى تۇلعالار تۋرالى كەڭ كولەمدە اقپارات بەرەتىن كىتاپ ماتەريالدارى قويىلعان. سونداي-اق بۇل زالدا اۋداننىڭ تاريحي-مادەني مۇراسىن ساقتاۋدا ماڭىزدى ورنى بار سيرەك كەزدەسەتىن كىتاپتار توپتاماسى ساقتالعان. مۇنىڭ ءبارى اۋدان تۇرعىندارى مەن قوناقتارىنىڭ يگلىگى ءۇشىن ۇسىنىلىپ وتىر، – دەدى گ. احانقىزى.
كىتاپحانانىڭ ەكىنشى قاباتىندا كىتاپحانانىڭ بالالار ءبولىمى ورنالاسقان. مۇندا ينتەرنەتكە قوسىلعان، كومپيۋتەرمەن جابدىقتالعان ءىت-زال بار. سونداي-اق 56 ورىندىق وقۋ زالىندا بالالاردىڭ جاس ەرەكشەلىكتەرىنە ساي ءتۇرلى تاقىرىپتىق كىتاپ كورمەلەرى ۇيىمداستىرىلعان. بۇل ولاردىڭ كىتاپ وقۋعا دەگەن قىزىعۋشىلىعىن ارتتىرا تۇسەدى. ۇيىرمەلەر وتكىزۋ ءۇشىن «بالاۋسا» وقۋ كەڭىستىگى جانە بالالاردىڭ پايدالى ۋاقىتىن ۇيىمداستىرۋعا ارنالعان كوۆوركينگ ورتالىعى قۇرىلعان. سونىمەن قاتار ەكىنشى قاباتتا ءتۇرلى مادەني ءىس-شارالاردى وتكىزۋگە جاعداي جاسالعان اكت زالى ورنالاسقان.
بالالار ءبولىمىنىڭ كىتاپ قورىمەن تانىسقان وبلىس باسشىسى ونى الداعى ۋاقىتتا جاڭا قۇندىلىقتارعا نەگىزدەلگەن جاڭا ادەبيەتپەن تولىقتىرۋ كەرەك ەكەنىن ايتتى. سول سياقتى «بالالاردىڭ IT زالىنا» ينتەرنەتتى پايدالانىپ، بالالارعا الەمنىڭ كەز كەلگەن ەلىندەگى كىتاپحانانىڭ وقىرمانى بولا الاتىنداي مۇمكىندىكتى ۇيرەتەتىن مامانداردى ارنايى تارتۋدى تاپسىردى.
مەكتەپ وقۋشىلارى كىتاپحانانىڭ وقۋ زالىندا كىتاپ، ءبىلىم تۋرالى قازاق قالامگەرلەرىنىڭ ولەڭدەرىن وقىدى.
ەسكە سالساق، بۇعان دەيىن اۋداندىق كىتاپحانا مەن بالالار كىتاپحاناسى اۋىلدىق اكىمدىك عيماراتىندا جانە ابىكەن سارىباەۆ اتىنداعى اۋداندىق مادەنيەت ءۇيىنىڭ ىشىندە وتىرعان بولعان.
جالپى، وڭىردە 150 كىتاپحانا بار. ولاردا 128 كلۋب پەن ۇيىرمەلەر، 29 كوۆوركينگ ورتالىعى جۇمىس ىستەيدى. وبلىس قۇرىلعالى بەرى كىتاپحانالارداعى كىتاپ قورىنىڭ سانى 2,8 ميلليوننان استى.
