اقش پەن يران «وتە جاقسى» كەلىسسوزدەر جۇرگىزدى. بۇل تۋرالى اقش پرەزيدەنتى دونالد ترامپ اق ۇيدە وتكەن ءباسپاسوز ءماسليحاتىندا مالىمدەدى، دەپ حابارلايدى «ادىرنا» ءتىلشىسى.
ونىڭ ايتۋىنشا، تاراپتار «جاقىن ارادا» كەلىسىمگە كەلىپ، قاقتىعىستى توقتاتۋى مۇمكىن.
«قازىر ءبارى جاقسى ءجۇرىپ جاتىر، ءبىز وزىمىزگە تيەسىلى ناتيجەگە قول جەتكىزۋىمىز كەرەك. ەگەر وعان قول جەتكىزبەسەك، كەلەسى ۇلكەن قادامدى جاساۋعا تۋرا كەلەدى. بىراق ولار كەلىسىم جاساعىسى كەلەدى»، – دەدى ترامپ.
پرەزيدەنتتىڭ سوزىنشە، تەگەران ۆاشينگتوننىڭ نەگىزگى تالابىن – يادرولىق قارۋ جاساۋدان باس تارتۋدى قابىلداعان. الايدا يران بيلىگى بۇل مالىمدەمەگە ءالى رەسمي پىكىر بىلدىرگەن جوق.
بۇعان دەيىن Axios باسىلىمى يران مەن اقش ء«وزارا تۇسىنىستىك تۋرالى ءبىر بەتتىك مەموراندۋمعا» قول قويۋعا جاقىن ەكەنىن حابارلاعان. بۇل قۇجات تاراپتار اراسىنداعى بەيبىت كەلىسىمنىڭ نەگىزىن قۇرىپ، كەيىنگى كەلىسسوزدەرگە جول اشپاق.
اتاپ ايتقاندا، قۇجاتتا 30 كۇندىك كەلىسسوزدەر قاراستىرىلعان. بۇل كەزەڭدە تاراپتار ورمۇز بۇعازى، يراننىڭ يادرولىق باعدارلاماسى جانە اقش سانكتسيالارى بويىنشا قوسىمشا كەلىسىمدەرگە كەلۋى ءتيىس.
«اق ءۇي يران مەموراندۋمعا اپتا سوڭىنا دەيىن قول قويادى دەپ كۇتۋدە»،– دەپ جازدى Axios.
يران بيلىگى بۇعان دەيىن اقش-تىڭ سوعىستى توقتاتۋ جونىندەگى ۇسىنىسىن قاراپ جاتقانىن جانە جاقىن ۋاقىتتا ءوز جاۋابىن پاكىستان ارقىلى بەرەتىنىن مالىمدەگەن. پاكىستان بۇل كەلىسسوزدەردە دەلدال رەتىندە ارەكەت ەتۋدە.
