AQŞ pen İran «öte jaqsy» kelıssözder jürgızdı. Būl turaly AQŞ prezidentı Donald Tramp Aq üide ötken baspasöz mäslihatynda mälımdedı, dep habarlaidy «Adyrna» tılşısı.
Onyŋ aituynşa, taraptar «jaqyn arada» kelısımge kelıp, qaqtyǧysty toqtatuy mümkın.
«Qazır bärı jaqsy jürıp jatyr, bız özımızge tiesılı nätijege qol jetkızuımız kerek. Eger oǧan qol jetkızbesek, kelesı ülken qadamdy jasauǧa tura keledı. Bıraq olar kelısım jasaǧysy keledı», – dedı Tramp.
Prezidenttıŋ sözınşe, Tegeran Vaşingtonnyŋ negızgı talabyn – iadrolyq qaru jasaudan bas tartudy qabyldaǧan. Alaida İran bilıgı būl mälımdemege älı resmi pıkır bıldırgen joq.
Būǧan deiın Axios basylymy İran men AQŞ «özara tüsınıstık turaly bır bettık memorandumǧa» qol qoiuǧa jaqyn ekenın habarlaǧan. Būl qūjat taraptar arasyndaǧy beibıt kelısımnıŋ negızın qūryp, keiıngı kelıssözderge jol aşpaq.
Atap aitqanda, qūjatta 30 kündık kelıssözder qarastyrylǧan. Būl kezeŋde taraptar Ormūz būǧazy, İrannyŋ iadrolyq baǧdarlamasy jäne AQŞ sanksiialary boiynşa qosymşa kelısımderge keluı tiıs.
«Aq üi İran memorandumǧa apta soŋyna deiın qol qoiady dep kütude»,– dep jazdy Axios.
İran bilıgı būǧan deiın AQŞ-tyŋ soǧysty toqtatu jönındegı ūsynysyn qarap jatqanyn jäne jaqyn uaqytta öz jauabyn Päkıstan arqyly beretının mälımdegen. Päkıstan būl kelıssözderde deldal retınde äreket etude.
BŪŪ Qauıpsızdık Keŋesı İrannyŋ Parsy şyǧanaǧyndaǧy körşı memleketterge şabuylyn toqtatudy talap ettı
