بۇۇ باس حاتشىسى انتونيۋ گۋتەرريش پارسى شىعاناعىنداعى قاقتىعىستىڭ ۋشىعۋىنا بايلانىستى پىكىر ءبىلدىردى، دەپ حابارلايدى «ادىرنا» ءتىلشىسى.
«پارسى شىعاناعىنداعى جاعدايدىڭ كۇرت شيەلەنىسۋىنە جانە اسكەري قاقتىعىستاردىڭ قايتا جاندانۋىنا قاتتى الاڭدايمىن. ونىڭ ىشىندە يراننىڭ ورمۇز بۇعازىنداعى كەمەلەرگە جاساعان شابۋىلدارى، اقش-تىڭ يرانعا بەرگەن سوققىلارى جانە يراننىڭ كورشى ەلدەردەگى نىساندارعا جاساعان شابۋىلدارى بار»، – دەدى ول 12 شىلدەدە X الەۋمەتتىك جەلىسىندەگى پاراقشاسىندا.
ونىڭ پىكىرىنشە، بارلىق شابۋىل دەرەۋ توقتاتىلۋى ءتيىس. تولىققاندى اسكەري قيمىلداردىڭ قايتا باستالۋى ءوڭىر حالىقتارى، حالىقارالىق بەيبىتشىلىك پەن قاۋىپسىزدىك، سونداي-اق الەمدىك ەكونوميكا ءۇشىن «اپاتتى سالدارعا» اكەلۋى مۇمكىن.
«يران مەن اقش-تى كەلىسسوزدەردى شۇعىل تۇردە قايتا باستاپ، قالعان كەلىسپەۋشىلىكتەردى ديپلوماتيالىق جولمەن رەتتەۋگە شاقىرامىن»، – دەپ اتاپ ءوتتى بۇۇ باس حاتشىسى.
ايتا كەتەيىك، قازىرگى ۋاقىتتا تەگەران مەن ۆاشينگتون جاعدايعا مۇلدە قاراما-قايشى باعا بەرىپ وتىر. يران بۇعاز ارقىلى ءوتۋ تەك ءتيىستى رۇقسات العاننان كەيىن عانا مۇمكىن ەكەنىن مالىمدەسە، اقش حالىقارالىق كەمە قاتىناسى قالىپتى رەجيمدە جالعاسىپ جاتقانىن العا تارتۋدا.
