مەملەكەت باسشىسى قاسىم-جومارت توقاەۆ قازاقستاندىقتاردى وتان قورعاۋشىلار كۇنىمەن قۇتتىقتادى، دەپ حابارلايدى «ادىرنا» ءتىلشىسى.
پرەزيدەنت بۇل مەرەكەنىڭ مەملەكەتتىك ءارى قوعامدىق ماڭىزى ەرەكشە ەكەنىن اتاپ ءوتىپ، جاۋىنگەرلەردىڭ ەرلىگى، رۋحى مەن قايسارلىعى ءاردايىم قۇرمەتكە لايىق ەكەنىن ايتتى.
«بۇل – قازاقستاننىڭ قاۋىپسىزدىگىن، تۇراقتىلىعى مەن تىنىشتىعىن كۇندىز-ءتۇنى قاس قاقپاي كۇزەتكەن، سونداي-اق قازىر وتان الدىنداعى بورىشىن ادال وتەپ جاتقان بارشا ازاماتقا قۇرمەت كورسەتىلەتىن كۇن. ەل جاۋىنگەرلەرى مەن كومانديرلەرى باتىر بابالارىمىزدىڭ داڭقتى جولىن جالعاستىرىپ، ناعىز وتانشىلدىق رۋحىنىڭ جارقىن ۇلگىسىن كورسەتىپ كەلەدى. ساردارلار مەن ساربازداردىڭ، بارلىق كۇشتىك قۇرىلىم قىزمەتكەرلەرىنىڭ بىتىمگەرلىك ميسسيالار، ارناۋلى وقۋ-جاتتىعۋ جيىندارى مەن ءتۇرلى حالىقارالىق سايىستار كەزىندەگى كاسىبي شەبەرلىگى، تەمىردەي ءتارتىبى مەن جاۋىنگەرلىك دايارلىعى – سونىڭ ايقىن دالەلى. قۋاتتى اسكەرىمىز ەڭ كۇردەلى مىندەتتەردى ورىنداۋعا قاشان دا دايىن ەكەنى ءسوزسىز. سوندىقتان مەملەكەت ەلىمىزدىڭ قورعانىس قابىلەتىن كۇشەيتۋگە جانە اسكەري قىزمەتشىلەردىڭ الەۋمەتتىك جاعدايىن جاقسارتۋعا ءاردايىم باسا ءمان بەرەدى»،– دەدى ول.
قاسىم-جومارت توقاەۆ كونستيتۋتسياداعى «قازاقستان رەسپۋبليكاسىن قورعاۋ – ءار ازاماتتىڭ قاسيەتتى پارىزى» دەگەن قاعيدانىڭ مەملەكەت پەن حالىقتىڭ ءوزارا جاۋاپكەرشىلىگىن ايقىندايتىنىن جەتكىزدى.
ء«بىز وتانعا قالتقىسىز قىزمەت ەتۋ قاعيداتىن جانە كونستيتۋتسيادا ايقىندالعان مىزعىماس قۇندىلىقتاردى نەگىزگە الا وتىرىپ، سان عاسىرلىق تاريحى بار مەملەكەتتىلىگىمىزدىڭ تۇعىرىن نىعايتا تۇسەمىز، بيىك ماقسات-مۇراتىمىزعا جەتىپ، ادىلەتتى، كۇشتى، قاۋىپسىز قازاقستاندى قۇرامىز. مەن بۇعان كامىل سەنەمىن. انتىنا ادال بولىپ، تاباندىلىق تانىتىپ، ءمىنسىز قىزمەت ەتىپ جۇرگەن وتان قورعاۋشىلارىمىزعا العىس ايتامىن. بارشا ازاماتتارىمىزعا مىقتى دەنساۋلىق، اماندىق جانە تابىس تىلەيمىن! ارميامىزدىڭ ايبىنى، حالقىمىزدىڭ ىنتىماعى ارتا بەرسىن! قاستەرلى تاۋەلسىزدىگىمىزدىڭ تۇعىرى بەكەم بولسىن!»– دەپ تۇيىندەدى پرەزيدەنت.
