پرەزيدەنت قاسىم-جومارت توقاەۆ سىرتقى ىستەر ءمينيسترى مۇرات نۇرتىلەۋدى قىزمەتىنەن بوساتتى، دەپ حابارلايدى "ادىرنا".
«مەملەكەت باسشىسىنىڭ جارلىعىمەن مۇرات ابۋعاليۇلى نۇرتىلەۋ قازاقستان رەسپۋبليكاسى پرەزيدەنتىنىڭ حالىقارالىق ينۆەستيتسيا جانە ساۋدا ىنتىماقتاستىعى جونىندەگى كومەكشىسى بولىپ تاعايىندالدى، ول بۇرىنعى اتقارعان لاۋازىمىنان بوساتىلدى»، - دەپ حابارلايدى اقوردا.
ال ونىڭ ورنىنا مەملەكەت باسشىسىنىڭ جارلىعىمەن سىرتقى ىستەر ءمينيسترى بولىپ ەرمەك كوشەرباەۆ تاعايىندالدى.
ايتا كەتەيىك، 2022 جىلعى 1 اقپاننان 2022 جىلعى 26 قاراشاعا دەيىن مۇرات نۇرتىلەۋ قازاقستان پرەزيدەنتى اكىمشىلىگىنىڭ باسشىسى بولدى. 2022 جىلعى 26 قاراشادا مەملەكەت باسشىسىنىڭ جارلىعىمەن قازاقستان پرەزيدەنتى اكىمشىلىگىنىڭ باسشىسى بولسا، 2023 جىلعى 3 ساۋىردە ەلىمىزدىڭ پرەمەر-ءمينيسترىنىڭ ورىنباسارى، سىرتقى ىستەر ءمينيسترى بولىپ تاعايىندالدى. ال 2024 جىلى 6 اقپاندا سىرتقى ىستەر ءمينيسترى لاۋازىمىنا قايتا تاعايىندالعان ەدى.
ەسكە سالا كەتەيىك، بيىل قىركۇيەكتە باق-تا سىرتقى ىستەر ءمينيسترى مۇرات نۇرتىلەۋدىڭ ۇستالعانى تۋرالى قاۋەسەت تارادى. ىلە-شالا جالعان اقپاراتقا قارسى ءىس-قيمىل ورتالىعى قازاقستاننىڭ سىرتقى ىستەر ءمينيسترى مۇرات نۇرتىلەۋ مەن كاسىپكەر گادجي گادجيەۆتىڭ ۇستالعانى تۋرالى اقپاراتتى جوققا شىعاردى.
ارادا ءبىر كۇن وتكەندە مۇرات نۇرتىلەۋ ەل الدىنا شىقتى. ول "Harvest Group" توراعاسى الماز السەنوۆپەن اگرو-يندۋستريالىق كلاستەردى قۇرۋ بارىسىن تالقىلاعان.
وسى ورايدا مادەنيەت جانە اقپارات ءمينيسترى ايدا بالاەۆا الەۋمەتتىك جەلىدەگى پاراقشاسىندا جازبا جاريالاپ، باق وكىلدەرىن جالعان اقپارات تاراتپاۋعا، جۋرناليستىك ەتيكانى ەستەن شىعارماۋعا شاقىردى.
سىرتقى ىستەر مينيسترلىگىنىڭ رەسمي وكىلى دە ۆەدومستۆو باسشىسىنىڭ ۇستالعانى تۋرالى اقپاراتتىڭ شىندىققا جاناسپايتىنىن ايتىپ، مۇنى جۋرناليستىك ەتيكانى جانە ەلىمىزدىڭ قولدانىستاعى زاڭناماسىن بۇزۋ دەپ باعالايتىندارىن جەتكىزدى.
ۇستالعانى تۋرالى قاۋەسەتتەن سوڭ مۇرات نۇرتىلەۋ پارلامەنت عيماراتىندا كەي اقپارات قۇرالدارىندا ءوزى تۋرالى تاراعان قاۋەسەتكە قاتىستى پىكىر ءبىلدىردى.
