اقش-تىڭ حالىقارالىق دامۋ جونىندەگى اگەنتتىگىنىڭ (USAID) ۆاشينگتونداعى شتاب-پاتەرى جابىلدى، ال اگەنتتىك قىزمەتكەرلەرى جۇمىسقا كەلمەۋ تۋرالى ەلەكتروندىق پوشتا حابارلاماسىن الدى. بۇل تۋرالى دۇيسەنبى، 3 اقپاندا CNN جازدى، دەپ حابارلايدى “ادىرنا” ۇلتتىق پورتالى.
"USAID باسشىلىعىنىڭ نۇسقاۋىمەن، اقش-تاعى رونالد رەيگان عيماراتىندا ورنالاسقان اگەنتتىكتىڭ شتاب-پاتەرى 2025 جىلعى 3 اقپاندا قىزمەتكەرلەر ءۇشىن جابىلادى. شتاب-پاتەردە ادەتتەگىدەي جۇمىس ىستەيتىن اگەنتتىك قىزمەتكەرلەرى ەرتەڭ قاشىقتان جۇمىس ىستەيتىن بولادى، تەك نەگىزگى قىزمەتتەردى ورىنداۋشى قىزمەتكەر عانا عيماراتتا بولادى، بۇل قىزمەتكەرلەرمەن جوعارى باسشىلىق جەكە بايلانىسادى", - دەلىنگەن ەلەكتروندى حاتتا.
تەلەحابارعا سايكەس، عيماراتتان USAID لوگوتيپتەرى مەن اگەنتتىكتىڭ قىزمەتىن سۋرەتتەيتىن فوتوسۋرەتتەر الىنىپ تاستالعان. اگەنتتىكتىڭ ۆەب-سايتى مەن الەۋمەتتىك جەلىلەردەگى اككاۋنتتارى دا جۇمىسىن توقتاتقان.
الدىڭعى كۇنى اقش پرەزيدەنتى دونالد ترامپ USAID باسشىلىعىنداعى وتستاۆكالاردى جاريالاعان بولاتىن. ول بۇل اگەنتتىكتى "راديكالدى، اقىلسىز توپ باسقارۋدا" دەپ اتاپ، ء"بىز ولاردى الىپ تاستايمىز، سودان كەيىن شەشىم قابىلدايمىز", دەپ مالىمدەدى. بۇعان قوسا، اقپارات قۇرالدارى اگەنتتىكتىڭ كەيبىر قىزمەتكەرلەرىن اقىسىز دەمالىسقا جىبەرگەنىن نەمەسە كەلىسىمشارتتارىن بۇزعانىن حابارلادى، بۇل جاعداي پرەزيدەنتتىڭ باسقا ەلدەرگە كومەك كورسەتۋ باعدارلامالارىن توقتاتۋ تۋرالى جارلىعىن اينالىپ ءوتۋ ارەكەتتەرىنە كۇدىك تۋدىردى.
بۇعان دەيىن اقش پرەزيدەنتى جاڭا ۇكىمەتتىك تيىمدىلىك دەپارتامەنتى باسشىلارىنىڭ ءبىرى ەتىپ تاعايىنداعان بيزنەسمەن يلون ماسك USAID-ءتى سىناعان بولاتىن. Tesla جانە SpaceX باس ديرەكتورى اگەنتتىكتى قىلمىستىق ۇيىم دەپ اتادى جانە USAID-ءتى كاسىپكەر COVID-19 دەپ اتاعان بيولوگيالىق قارۋدى ازىرلەۋدى قارجىلاندىردى دەپ ايىپتادى. ماسك ءوز سوزدەرىن ەشقانداي دالەلمەن راستامادى.
ايتا كەتسەك، USAID شەتەلدەگى ازاماتتىق كومەك جانە دامۋ ىنتىماقتاستىعى سالاسىنداعى جۇمىستاردى باسقاراتىن اگەنتتىك. ونىڭ جىلدىق بيۋدجەتى 42,8 ميلليارد دوللاردى قۇرايدى.
