الماتى قالاسىندا اقش باس كونسۋلدىعىنىڭ ءۇي-جايىن سالۋ ءۇشىن 70 593 شارشى مەتر جەر ۋچاسكەسى 49 جىل مەرزىمگە جالعا بەرىلەدى. بۇل تۋرالى ءتيىستى زاڭ جوباسىن بۇگىن سەنات دەپۋتاتتارى ماقۇلدادى، دەپ حابارلايدى "ادىرنا" ۇلتتىق پورتالى.
سەناتور امانگەلدى نۇعىمانوۆتىڭ مالىمەتىنشە، بۇل كەلىسىم مەملەكەت باسشىسىنىڭ بۇۇ-نىڭ 74-سەسسياسىنا قاتىسۋ قورىتىندىسى بويىنشا بەرگەن تاپسىرماسىن جۇزەگە اسىرۋ ماقساتىندا ازىرلەنگەن. كەلىسىمگە 2023 جىلدىڭ 27 قىركۇيەگىندە نيۋ-يورك قالاسىندا قازاقستان مەن اقش ۇكىمەتتەرى اراسىندا قول قويىلعان.
كەلىسىم اياسىندا اقش ۇكىمەتى جەر تەلىمى ءۇشىن 25 ميلليون اقش دوللارىن ءبىر جولعى تولەم رەتىندە تولەيدى. بۇل تولەم كەلىسىم كۇشىنە ەنگەن كۇننەن باستاپ 30 كۇن ىشىندە جۇزەگە اسىرىلادى. سونىمەن قاتار، اقش تاراپى بۇل جەر مەن بولاشاق كونسۋلدىق عيماراتقا بايلانىستى بارلىق سالىقتار مەن وزگە دە تولەمدەردەن بوساتىلادى، جالداۋ اقىسىنان باسقا.
اقش كونسۋلدىعىنىڭ قۇرىلىسى، ونى كۇتىپ ۇستاۋ، جوندەۋ جۇمىستارى، بايلانىس جانە كوممۋنالدىق قىزمەتتەر شىعىندارى تۇگەلدەي اقش ۇكىمەتىنىڭ ەسەبىنەن جۇرگىزىلەدى. يمپورتتالاتىن قۇرىلىس ماتەريالدارى مەن قاجەتتى تاۋارلار كەدەندىك تولەمدەر مەن سالىقتاردان جانە رۇقسات بەرۋ تالاپتارىنان بوساتىلادى.
باس كونسۋلدىق اۋماعىندا اقش-تىڭ ەسىرتكىمەن كۇرەس اگەنتتىگى مەن قازاقستانداعى اقش ساۋدا مينيسترلىگىنىڭ وكىلدىگى ورنالاسادى. بۇل قۇرىلىمدار امەريكالىق كومپانيالاردىڭ قازاقستاندىق نارىققا شىعۋىنا جاردەمدەسىپ، ەكى ەل اراسىنداعى ساۋدا-ەكونوميكالىق ىنتىماقتاستىقتى دامىتۋعا باعىتتالعان.
كەلىسىمگە سايكەس، اقش تاراپى دا قازاقستان رەسپۋبليكاسىنىڭ حيۋستون قالاسىندا باس كونسۋلدىق اشۋعا رۇقسات بەرمەك.
ۇقساس جاڭالىقتار
