فوتو: president.kg
قىرعىزستان پرەزيدەنتى سادىر جاپاروۆ اقپانداعى ساياسي وقيعالار، توڭكەرىس جاساۋ ارەكەتى بولۋى مۇمكىن دەگەن بولجامدار، ارنايى قىزمەتتىڭ جۇمىسى جانە ۇلتتىق قاۋىپسىزدىك مەملەكەتتىك كوميتەتىنىڭ (ۇقمك) بۇرىنعى باسشىسى قامشىبەك تاشيەۆتىڭ تۋىستارىنا قاتىستى رەزونانستىق قىلمىستىق ىستەر تۋرالى سۇراقتارعا پىكىر ءبىلدىردى, دەپ حابارلايدى “ادىرنا”.
ۇزاق ۋاقىتتان كەيىن العاش رەت ول مەملەكەتتىك ەمەس باق-تىڭ سۇراقتارىنا جاۋاپ بەردى.
جاپاروۆتىڭ ايتۋىنشا، قوعامدا توڭكەرىس جاساۋ ارەكەتى دەپ اتالعان اقپان وقيعالارى باستاپقى كەزدەن-اق ونىڭ باقىلاۋىندا بولعان. «75 ادامنىڭ حاتى» دەپ اتالعان جاعداي بويىنشا اقپارات وزىنە ەرتە جەتكەنىن ايتىپ، ول بۇل حاتتىڭ پارلامەنتتەگى بارلىق كەزەڭىن، پلەنارلىق وتىرىسقا دەيىن قاداعالاپ وتىرعانىن جەتكىزدى. سول وقيعالاردان كەيىن مانداتىنان باس تارتقان دەپۋتاتتار ء«وز كىناسىن ءتۇسىندى» دەپ مالىمدەدى.
بۇرىنعى ۇقك توراعاسى قامشىبەك تاشيەۆتىڭ ىقتيمال قاتىسى تۋرالى سۇراققا پرەزيدەنت ناقتى جاۋاپ بەرمەي، تەرگەۋ اياقتالماعانىن ايتتى. ال تاشيەۆتىڭ اعاسى، دەپۋتات شايىربەك قازىر قاماۋدا. تەرگەۋ دەرەكتەرىنە سايكەس، ول «كىرگىزنەفتەگاز» كاسىپورنىنداعى جەمقورلىق سحەماسىنا قاتىسىپ، مەملەكەتكە 4 ميلليارد سومنان استام شىعىن كەلتىرگەن. پرەزيدەنت ونىڭ تەك كەلتىرىلگەن شىعىن تولىق وتەلگەن جاعدايدا عانا بوستاندىققا شىعۋى مۇمكىن ەكەنىن اتاپ ءوتتى.
جاپاروۆقا قاتىستى تاعى ءبىر تالقىلانعان تاقىرىپ — ونىڭ كىشى ۇلى نۋردوولوتتىڭ كريپتوۆاليۋتا ميللياردەرى دجاستين سانمەن بىرگە الا-ارچا رەزيدەنتسياسىندا بولۋى. پرەزيدەنت ۇلىنىڭ تەك اعىلشىن ءتىلىن جاقسى بىلەتىندىكتەن اۋدارماشى رەتىندە قاتىسقانىن، مەملەكەتتىك ىستەرگە ارالاسپايتىنىن جانە بيزنەس جۇرگىزبەيتىنىن ايتتى.
سونداي-اق پرەزيدەنتتىڭ باۋىرى سابىردىڭ التىنمەن بايلانىستى فوتولارى تۋرالى اقپاراتتى «100 پايىز جالعان» دەپ جوققا شىعارىپ، ونىڭ تۇركياداعى التىن وڭدەۋ زاۋىتىندا جاي عانا سۋرەتكە تۇسكەنىن ءتۇسىندىردى.
جاپاروۆ ماسكەۋگە جاساعان سوڭعى ساپارى تۋرالى دا ايتتى. ونىڭ سوزىنشە، رەسەي پرەزيدەنتى ۆلاديمير پۋتينمەن كەزدەسۋدى ءوزى ۇسىنعان. كەزدەسۋ ەكى ساعاتتان استام ۋاقىتقا سوزىلىپ، ەكىجاقتى ماڭىزدى ماسەلەلەر بويىنشا كەلىسىمدەرگە قول جەتكىزىلگەن.
