Фото: president.kg
Қырғызстан президенті Садыр Жапаров ақпандағы саяси оқиғалар, төңкеріс жасау әрекеті болуы мүмкін деген болжамдар, арнайы қызметтің жұмысы және Ұлттық қауіпсіздік мемлекеттік комитетінің (ҰҚМК) бұрынғы басшысы Қамшыбек Тәшиевтің туыстарына қатысты резонанстық қылмыстық істер туралы сұрақтарға пікір білдірді, деп хабарлайды “Адырна”.
Ұзақ уақыттан кейін алғаш рет ол мемлекеттік емес БАҚ-тың сұрақтарына жауап берді.
Жапаровтың айтуынша, қоғамда төңкеріс жасау әрекеті деп аталған ақпан оқиғалары бастапқы кезден-ақ оның бақылауында болған. «75 адамның хаты» деп аталған жағдай бойынша ақпарат өзіне ерте жеткенін айтып, ол бұл хаттың парламенттегі барлық кезеңін, пленарлық отырысқа дейін қадағалап отырғанын жеткізді. Сол оқиғалардан кейін мандатынан бас тартқан депутаттар «өз кінәсін түсінді» деп мәлімдеді.
Бұрынғы ҰҚК төрағасы Қамшыбек Тәшиевтің ықтимал қатысы туралы сұраққа президент нақты жауап бермей, тергеу аяқталмағанын айтты. Ал Тәшиевтің ағасы, депутат Шайырбек қазір қамауда. Тергеу деректеріне сәйкес, ол «Кыргызнефтегаз» кәсіпорнындағы жемқорлық схемасына қатысып, мемлекетке 4 миллиард сомнан астам шығын келтірген. Президент оның тек келтірілген шығын толық өтелген жағдайда ғана бостандыққа шығуы мүмкін екенін атап өтті.
Жапаровқа қатысты тағы бір талқыланған тақырып — оның кіші ұлы Нурдоолоттың криптовалюта миллиардері Джастин Санмен бірге Ала-Арча резиденциясында болуы. Президент ұлының тек ағылшын тілін жақсы білетіндіктен аудармашы ретінде қатысқанын, мемлекеттік істерге араласпайтынын және бизнес жүргізбейтінін айтты.
Сондай-ақ президенттің бауыры Сабырдың алтынмен байланысты фотолары туралы ақпаратты «100 пайыз жалған» деп жоққа шығарып, оның Түркиядағы алтын өңдеу зауытында жай ғана суретке түскенін түсіндірді.
Жапаров Мәскеуге жасаған соңғы сапары туралы да айтты. Оның сөзінше, Ресей президенті Владимир Путинмен кездесуді өзі ұсынған. Кездесу екі сағаттан астам уақытқа созылып, екіжақты маңызды мәселелер бойынша келісімдерге қол жеткізілген.
