Foto: Dmitrii Erofeev
Memleket basşysynyŋ tapsyrmasymen Jetısu oblysynda 3 eko-saiabaq qūru jūmystary bastaldy. Sonyŋ bırı – Sarqan qalasyndaǧy «Qoitas». Öŋır basşysy Beibıt İsabaev Sarqan audanyna jasaǧan jūmys sapary barysynda saiabaqtyŋ abattandyru, körkeitu jūmystarymen tanysty, dep habarlaidy Jetısu oblysy äkımınıŋ baspasöz qyzmetı.
Belgılı bolǧandai, tabiǧi landşafty saqtalǧan saiabaq 2022 jyly qūrylǧan. Ötken jyly mūnda 850 metr jaiau jürgınşıler joly töselıp, oryndyqtar, jaryqtandyru jüielerı, balalar oiyn alaŋy, subūrqaq jäne qoqys jäşıkterı ornatyldy. Sonymen qatar mädeni-köpşılık ıs-şaralardy ötkızuge arnalǧan 400 oryndyq amfiteatr, ekı baqylau alaŋy, 11 müsın men şaǧyn säulet nysandary, sondai-aq zamanaui sanitarlyq torap salyndy. 1220 tüp aǧaş köşetı otyrǧyzyldy. Qauıpsızdıktı qamtamasyz etu üşın beinebaqylau kameralary ornatyldy.
Audan äkımı Ǧalymjan Mamanbaevtyŋ aituynşa, biyl saiabaq aumaǧyn 6 gektardan 20 gektarǧa deiın ūlǧaitu josparlanyp otyr. Būl rette öŋır basşysyna nysandy keŋeitu jäne odan ärı abattandyru jobasy tanystyryldy.
- Qazırgı uaqytta jobalyq-smetalyq qūjattama äzırlenude. Özen jaǧalauy boiymen qaiyqpen seruendeuge mümkındık beretın demalys aimaǧynyŋ qūrylysy jürgızılıp jatyr, sondai-aq tūrǧyndarǧa arnalǧan demalys oryndary jabdyqtaluda. Eko-saiabaqta tu tūǧyryn ornatu, «şahmat aralyn» jasau, etnoauyl qūru, tört trassasy bar jyl boiy jūmys ısteitın tiubing aimaǧyn, subūrqaq pen jasandy syrǧanaq salu josparlanǧan. Būdan bölek, jaiau jürgınşıler jolyn Molaly köpırıne deiın ūzartu jäne saiabaqtyŋ qoljetımdılıgın arttyru üşın qosymşa jaiau köpır salu qarastyrylǧan, - dep atap öttı Ǧ. Mamanbaev.
Nysan kezeŋ-kezeŋımen abattandyrylyp, qazırdıŋ özınde audan tūrǧyndarynyŋ süiıktı demalys oryndarynyŋ bırı bolyp otyr. Būl rette oblys äkımı:
- Būl - tabiǧi landşafty saqtalǧan ekologiialyq park. Tabiǧattyŋ būl erekşe syiy äsem säulettık şeşımdermen bezendırıle otyryp, özınıŋ bastapqy qalpynda saqtaluy tiıs. Sondyqtan ärbır şarşy metr tiımdı paidalanyluy kerek, osy oraida tek aǧaş, tas, topyraq siiaqty tabiǧi materialdar qoldanyluy tiıs. Sızderge eko-parktı damytudyŋ strategiialyq josparyn äzırlep, ūsynudy tapsyramyn. Barlyq jūmysty 2027 jyly tolyq aiaqtaudy josparlau kerek. Jalpy alǧanda, būl eko-park bolaşaqta tek jergılıktı tūrǧyndardy ǧana emes, elımızdıŋ basqa öŋırlerınen keletın qonaqtardy da tartatyn bıregei demalys ornyna ainalady, — dedı B. İsabaev.
Atap ötsek, Jetısu oblysynda «Taza Qazaqstan» baǧdarlamasy aiasynda jalpy aumaǧy 84 gektar bolatyn üş eko-saiabaq qūrylady. Olar - Taldyqorǧan qalasyndaǧy «Tasbaqa», Tekelı qalasyndaǧy «Serkesai» jäne Sarqan qalasyndaǧy «Qoitas». Atalǧan jobalardy ıske asyru tabiǧi landşafty saqtauǧa jäne halyqtyŋ tūrmys sapasyn arttyruǧa baǧyttalǧan. Jetısu öŋırıne keletın turister üşın eko-saiabaqtar negızgı körnektı oryndardyŋ bırı bolmaq.
