پرەزيدەنت قاسىم-جومارت توقاەۆ 2027 جىلى بۇۇ باس حاتشىسى قىزمەتىنە ۇمىتكەر اتانۋى مۇمكىن. بۇل تۋرالى رەسەيلىك «ۆەدوموستي» باسىلىمى جازدى، دەپ حابارلايدى «ادىرنا» ءتىلشىسى.
«نيۋ-يوركتە العاشقى كانديداتتارمەن ينتەراكتيۆتى ديالوگتار باستالىپ كەتتى، الايدا قاۋىپسىزدىك كەڭەسىنىڭ تۇپكىلىكتى تاڭداۋى بيىلعى كۇزگە دەيىن كۇتپەگەن وزگەرىستەرگە ۇشىراۋى مۇمكىن»،-دەلىنگەن حابارلامادا.
ۇيىمنىڭ قازىرگى باسشىسى انتونيۋ گۋتەرريش 2026 جىلدىڭ سوڭىندا وكىلەتتىگىن توقتاتادى. قازىر نەگىزگى تالقىلاۋلار لاتىن امەريكاسى مەن افريكا ەلدەرىنەن شىققان ءتورت ساياساتكەردىڭ توڭىرەگىندە ءجۇرىپ جاتىر. ۇمىتكەرلەر قاتارىندا ماگاتە باس ديرەكتورى رافاەل گروسسي، ءچيليدىڭ بۇرىنعى پرەزيدەنتى ميشەل باچەلەت، سەنەگالدىڭ ەكس-پرەزيدەنتى ماكي سال جانە بۇۇ-نىڭ ساۋدا جانە دامۋ جونىندەگى كونفەرەنتسياسىنىڭ باسشىسى رەبەككا گرينسپان بار.
گەوگرافيالىق روتاتسيانىڭ بەيرەسمي قاعيداسىنا سايكەس، كەلەسى باسشى لاتىن امەريكاسىنان بولۋى ءتيىس. الايدا تاريحي تاجىريبە كورسەتكەندەي، كەيدە ىمىرا ءۇشىن بۇل قاعيدا باسشىلىققا الىنباۋى دا مۇمكىن.
شەتەلدىك باق توقاەۆتىڭ تىزىمگە كەش قوسىلۋى ىقتيمال نۇسقا رەتىندە قاراستىرىلاتىنىن مالىمدەدى. 2016 جىلى ءدال وسىنداي جاعداي كۇزدە ۇسىنىلعان كريستالينا گەورگيەۆا مىسالىندا بولعان. قاسىم-جومارت توقاەۆ تاجىريبەلى كاسىبي ديپلومات رەتىندە تانىلعان، بۇۇ-نىڭ ءتورت رەسمي ءتىلىن مەڭگەرگەن جانە جەنەۆاداعى كەڭسەنى باسقارعان كەزەڭدە باس حاتشىنىڭ ورىنباسارى قىزمەتىن اتقارعان. ونىڭ ىقتيمال جوسپارلارى تۋرالى اڭگىمەلەر تۇركيانىڭ انتاليا قالاسىندا وتكەن ديپلوماتيالىق فورۋمداعى باعدارلامالىق سوزىنەن كەيىن كۇشەيدى. وندا ول حالىقارالىق ۇيىمداردىڭ ءرولىنىڭ تومەندەۋىنە الاڭداۋشىلىق بىلدىرگەن.
«بارلىق نەگىزگى كەلىسسوزدەر بۇۇ مەن وزگە دە ءىرى حالىقارالىق قۇرىلىمدار الاڭىنان تىس جەردە ءوتىپ جاتىر. بۇل – كۇردەلى ماسەلە»، – دەدى پرەزيدەنت.
رەسمي تۇردە مەملەكەت باسشىسىنىڭ وكىلەتتىگى 2029 جىلى اياقتالادى. وتكەن جىلدىڭ باسىندا ول بۇۇ قۇرىلىمدارىنداعى جۇمىس تاجىريبەسى وزىنە جەتكىلىكتى ەكەنىن ايتقان بولاتىن. سونىمەن بىرگە ساراپشىلار 2026 جىلعى ناۋرىزداعى جاڭا كونستيتۋتسيانى قابىلداۋ جونىندەگى رەفەرەندۋمنىڭ جەدەل وتكىزىلۋىن مىسالعا كەلتىرىپ، بيلىكتىڭ ساياسي يكەمدىلىگىن اتاپ وتەدى.
رەسەي پرەزيدەنتىنىڭ ءباسپاسوز حاتشىسى دميتري پەسكوۆ قاسىم-جومارت توقاەۆتىڭ ءوز كانديداتۋراسىن ۇسىنۋ ماسەلەسى بويىنشا كرەملمەن كونسۋلتاتسيالار جۇرگىزبەگەنىن مالىمدەدى.
«ساراپشىلاردىڭ پىكىرىنشە، قازاقستان باسشىسىنىڭ بۇۇ-عا ىقتيمال اۋىسۋى ماسكەۋ ءۇشىن قىزىقتى ستسەناري بولۋى مۇمكىن، الايدا باتىس ەلدەرى ونى رەسەيگە تىم جاقىن تۇلعا رەتىندە قابىلداۋى ىقتيمال. بۇۇ باس حاتشىسىنىڭ بۇرىنعى ورىنباسارى سەرگەي وردجونيكيدزە قازاقستان پرەزيدەنتىنىڭ سايىسقا كەش قوسىلۋى قاۋىپسىزدىك كەڭەسىنىڭ تۇراقتى مۇشەلەرى ۇزاق ۋاقىت بويى ورتاق كانديداتۋراعا كەلە الماعان جاعدايدا عانا شىنايى بولۋى مۇمكىن ەكەنىن ايتتى»،-دەپ جازدى رەسەيلىك باسىلىم.
ەسكە سالايىق، بۇعان دەيىن قاسىم-جومارت توقاەۆ بىرىككەن ۇلتتار ۇيىمىن رەفورمالاۋ ماسەلەسىنە جاۋاپكەرشىلىكپەن قاراۋعا شاقىرعان ەدى. ول بۇۇ-نىڭ بەدەلىن كوتەرىپ، تيىمدىلىگىن ارتتىرۋدىڭ ماڭىزدى ەكەنىن ايتقان.
