استانا قالاسىنىڭ اكىمى جەڭىل رەلستى كولىك جوباسى جاقىن اپتالاردا ىسكە قوسىلاتىنىن ايتتى، دەپ حابارلايدى "ادىرنا" ۇلتتىق پورتالى.
اكىمنىڭ ايتۋىنشا، LRT-نىڭ ناقتى اشىلۋ كۇنى ازىرگە بەلگىلەنبەگەن. دەگەنمەن، رەسمي ىسكە قوسار الدىندا جۋرناليستەرگە ارنالعان قىسقاشا پرەسس-تۋر ۇيىمداستىرۋ جوسپارلانىپ وتىر.
«الداعى 2–3 اپتا ىشىندە ىسكە قوسۋدى كوزدەپ وتىرمىز»، – دەدى قالا باسشىسى.
جەڭىس قاسىمبەكتىڭ سوزىنشە، بۇگىندە LRT جۇيەسى تولىق سىناقتان ءساتتى وتكەن. قازىرگى تاڭدا 18 پويىز جەلىگە شىعىپ، تۇراقتى رەجيمدە جۇمىس ىستەۋدە. قوزعالىس ينتەرۆالى شامامەن 3,5 مينۋتتى قۇرايدى، ال جىلدامدىعى وزگە كولىك تۇرلەرىنە قاراعاندا ەكى ەسە جوعارى.
سونىمەن قاتار، نەگىزگى ستانتسيالار دايىن. ولاردىڭ قاتارىندا «ابۋ-دابي پلازا»، «بوتانيكالىق باق»، «استانا ارەنا»، Mega, «اۋەجاي» جانە جاڭا تەمىرجول ۆوكزالى بار.
