استانا قالاسىنىڭ اكىمى جەڭىس قاسىمبەك الەۋمەتتىك جەلىدەگى پاراقشاسىندا تاۋەلسىزدىك داڭعىلىنداعى كوپىردىڭ قۇرىلىس بارىسىمەن تانىسقانىن ءمالىم ەتتى، دەپ حابارلايدى “ادىرنا” ۇلتتىق پورتالى.
تاۋەلسىزدىك داڭعىلىنىڭ بويىنداعى كوپىردىڭ قۇرىلىس بارىسىمەن تانىستىم. وسى ايدىڭ سوڭىندا كوپىر ۇستىندەگى قوزعالىستى اشۋدى جوسپارلاپ وتىرمىز. اۆتوكولىك كوپىرى – ءتورت جولاقتى. كوگالداندىرۋ جۇمىسى كوكتەمدە اياقتالادى. بۇل كوپىر جولدارداعى كەپتەلىستى ەداۋىر جەڭىلدەتۋگە مۇمكىندىك بەرەدى: سول جاعالاۋدى تاۋەلسىزدىك داڭعىلىمەن، جاڭا تەمىرجول ۆوكزالىمەن، قوشقارباەۆ داڭعىلىمەن، ناجىمەدەنوۆ كوشەسىمەن، ازىرەت سۇلتان مەشىتىمەن، بايتۇرسىنوۆ، قورداي، ايناكول كوشەلەرىمەن، مومىشۇلى داڭعىلىمەن جانە ت.ب. قوسىمشا بايلانىستى قامتاماسىز ەتەدى، - دەپ جازدى جەڭىس قاسىمبەك.
كەلەر جىلى كەنەسارى كوشەسىنىڭ بويىندا (قازگيۋ ۋنيۆەرسيتەتى اۋدانىندا) ەسىل وزەنى ارقىلى وتەتىن تاعى ءبىر كوپىردىڭ قۇرىلىسىن باستالماق. قازىر جوبالاۋ جۇمىسى ءجۇرىپ جاتىر.
سونىمەن قاتار كەلەسى جىلى تاۋەلسىزدىك داڭعىلىنىڭ قابانباي باتىر داڭعىلىنا دەيىنگى جالعاسىن سالۋعا كىرىسەمىز. بۇل قالانىڭ جاڭا بولىگىندەگى ماڭگىلىك ەل، قابانباي باتىر داڭعىلدارىندا، تۇركىستان، كەرەي-جانىبەك حاندار جانە ايتماتوۆ كوشەلەرىندە كولىك اعىنىن سەيىلتەدى، - دەدى اكىم.
وتكەن جىلى ۇلى دالا داڭعىلىنىڭ بويىنداعى جاڭا كوپىر مەن ا62 كوشەسىنىڭ بويىندا (ا91 كوشەسىنەن استانا-قاراعاندى تاس جولىنا دەيىنگى ۋچاسكەدە) كولىك قوزعالىسى اشىلعان بولاتىن. بۇل دا بىرنەشە كوشەدەگى كولىك قوزعالىسىن سەيىلتتى.
