«قورعاس» ايماعىنداعى «نۇر جولى» وتكىزۋ پۋنكتى مەن «التىنكول» ستانسىسى – ەلىمىزدىڭ وڭتۇستىك-شىعىس شەكاراسى ماڭىنداعى باستى كولىك توراپتارى. قازىرگى ۋاقىتتا مۇندا وتكىزۋ قابىلەتىن ارتتىرۋ جانە تسيفرلاندىرۋ باعىتىندا قارقىندى جۇمىس جۇرگىزىلۋدە.
«نۇر جولى» كەدەن بەكەتى باسشىسىنىڭ ورىنباسارى سەرىك داۋكەنوۆتىڭ ايتۋىنشا، جۇمىس تيىمدىلىگىن ارتتىرۋ ءۇشىن «نۇر جولى» وتكىزۋ پۋنكتىندە CarGoRuqsat ەلەكتروندىق كەزەك جۇيەسى ەنگىزىلگەن. پۋنكتتىڭ ءوزى 2023 جىلدىڭ تامىز ايىنان بەرى تاۋلىك بويعى جۇمىس رەجيمىنە كوشكەن. سونداي-اق بيىل پۋنكت اۋماعىندا ءىرى گاباريتتى كولىكتەرگە ارنالعان ۇزىندىعى 2,4 شاقىرىم اينالما جولدىڭ قۇرىلىسى اياقتالدى. سونىڭ ناتيجەسىندە ينفراقۇرىلىمعا تۇسەتىن جۇكتەمە 40-45% ازايىپ، قىزمەت كورسەتىلەتىن كولىكتەر سانى ارتتى.
– مۇندا 12 ينسپەكتسيالىق تەكسەرۋ كەشەنى، رادياتسيالىق باقىلاۋدى تەكسەرەتىن 21 قوندىرعى بار. كەدەن بەكەتىنىڭ وتكىزۋ قابىلەتى جىلدان جىلعا ءوسىپ كەلەدى. ماسەلەن 2024 جىلى ەكى جاق باعىتتا 439 مىڭ جۇك كولىگىن وتكىزسەك، بىلتىر كورسەتكىش 542 مىڭعا جەتتى، – دەدى س. داۋكەنوۆ.
سونىمەن قاتار كەدەن بەكەتى اۋماعىندا بەلگيالىق «Sarens» كومپانياسىنىڭ قويما كەشەنى مەن جاڭا اينالما جول سالۋ جوباسى ىسكە اسىرىلۋدا. «نۇر جولىنىڭ» وتكىزۋ قابىلەتىن ارتتىرۋ ءۇشىن جيناقتاۋ الاڭدارى مەن جول بويىنداعى ينفراقۇرىلىمدى دامىتۋ جۇمىستارى جۇرگىزىلۋدە. حالىقارالىق اۆتوۆوكزال قۇرىلىسىن قوسا العاندا، 15 مىڭعا دەيىن اۆتوكولىكتى ورنالاستىرۋعا مۇمكىندىك بەرەتىن ءتورت ينۆەستيتسيالىق جوبا ىسكە اسىرىلىپ جاتىر.
شەكارالىق ايماقتاعى نەگىزگى تەمىرجول تورابى – «التىنكول» ستانسىسىندا 6 كەڭ جولدان تۇراتىن جاڭا ەكسپورتتىق پاركتىڭ قۇرىلىسى اياقتالدى. ستانسى بەكەتىنىڭ باستىعى دانيار نۇرقاسىموۆتىڭ ايتۋىنشا، مۇندا ۇزىندىعى 294 شاقىرىم بولاتىن «التىنكول-جەتىگەن» ۋچاسكەسىن جاڭعىرتۋ جوباسى ىسكە اسىرىلۋدا.
– ستانسى باسىندا سۇرىپتاۋ جۇيەسى جانە كەڭ تاباندى جولعا قوسىمشا جولدار سالىنادى. تار تاباندى جولعا قوسىمشا تاعى 4 جول قوسىلادى. جوبا اياقتالعاننان كەيىن تەمىرجول باعىتىنىڭ وتكىزۋ قابىلەتى تاۋلىگىنە 18-دەن 33 جۇپ پويىزعا دەيىن ارتادى، – دەدى دانيار نۇرقاسىموۆ.
مەملەكەت باسشىسىنىڭ تاپسىرماسىنا سايكەس كولىك لوگيستيكاسى ينفراقۇرىلىمدىق دەڭگەيدەن ەكونوميكالىق دەڭگەيگە كەزەڭ-كەزەڭىمەن كوشىرىلىپ، سونىڭ ناتيجەسىندە «نۇر جولى» كەدەن بەكەتى مەن «التىنكول» ستانسىسىنداعى اۆتوموبيل جانە تەمىرجول جولدارىنىڭ وتكىزۋ قابىلەتى ارتتىرىلدى، جۇك جانە جولاۋشىلار تاسىمالى كولەمى ارتىپ، كىرىستەر ۇلعايۋدا.
اتاپ وتسەك، سوڭعى 4 جىلدا «نۇر جولى» اۆتوموبيل وتكىزۋ پۋنكتىنەن ەكى تاراپقا وتكەن كولىك قۇرالدارىنىڭ سانى 99 مىڭ بىرلىكتەن (2022 جىل) 542 مىڭ بىرلىككە (2025 جىل) دەيىن، ياعني 5,5 ەسەگە وسكەن.
