جاپونيادا حونسيۋ ارالىنىڭ سولتۇستىك-شىعىس جاعالاۋىندا ماگنيتۋداسى 7,4 بولاتىن كۇشتى جەر سىلكىنىسى تىركەلدى، دەپ حابارلايدى "ادىرنا" ۇلتتىق پورتالى NHK تەلەارناسىنا سىلتەمە جاساپ.
جاپونيانىڭ مەتەورولوگيالىق اگەنتتىگى مەن اقش گەولوگيالىق قىزمەتى مالىمەتىنشە، جەراستى دۇمپۋلەرى تەڭىز جاعالاۋىنا جاقىن اۋماقتا بولعان. ماماندار باستاپقىدا يۆاتە پرەفەكتۋراسى مەن حوككايدو، اوموري پرەفەكتۋراسى وڭىرلەرى ءۇشىن بيىكتىگى 3 مەترگە دەيىن جەتەتىن تسۋنامي قاۋپى بارىن ەسكەرتكەن. كەيىن بۇل ەسكەرتۋ تومەندەتىلىپ، كەڭەس بەرۋ دەڭگەيىنە اۋىستىرىلدى.
جاپونيانىڭ تابيعي اپاتتاردى باسقارۋ اگەنتتىگى بەس پرەفەكتۋرادا 176 مىڭنان استام تۇرعىنعا ەۆاكۋاتسيا تۋرالى نۇسقاۋ بەرىلگەنىن مالىمدەدى. ەل پرەمەر-ءمينيسترى ساناە تاكايچي تۇرعىنداردى قاۋىپسىز ايماقتارعا، بيىك جەرلەرگە نەمەسە ارنايى ەۆاكۋاتسيالىق عيماراتتارعا دەرەۋ كوشۋگە شاقىردى.
قازىرگى ۋاقىتتا زارداپ شەككەندەر نەمەسە قيراعان عيماراتتار تۋرالى ناقتى اقپارات تۇسكەن جوق، جاعداي ءالى دە باعالانۋدا. دەگەنمەن، اپات سالدارىنان 200-گە جۋىق نىساندا ەلەكتر ەنەرگياسى وشكەن.
تەمىرجول وپەراتورلارى كەيبىر باعىتتاردا پويىز قوزعالىسىنىڭ ۋاقىتشا توقتاتىلعانىن حابارلادى. ال Tokyo Electric Power Company مەن Tohoku Electric Power Company اتوم ەلەكتر ستانتسيالارىندا ەشقانداي اقاۋ تىركەلمەگەنىن، رادياتسيا دەڭگەيى قالىپتى ەكەنىن مالىمدەدى.
