ىستىقكول تۇبىنەن ەجەلگى قالانىڭ ورنى تابىلدى

قىرعىزستانداعى ىستىقكول كولىنىڭ تۇبىنەن كونە قالاعا ۇقساس نىساندار انىقتالعان، دەپ حابارلايدى "ادىرنا" ۇلتتىق پورتالى Econews-قا سىلتەپ.

باق دەرەگىنشە، سۇڭگۋىرلەر مەن ارحەولوگتار سۋاستى ەكسپەديتسياسى بارىسىندا تورۋ-ايعىر ماڭىنداعى اۋماقتى زەرتتەپ، ورتاعاسىرلىق قونىستىڭ بولعانىن راستاعان. عالىمدار سۋ استىنان كىرپىشتەن قالانعان عيماراتتاردىڭ قالدىقتارىن، پەش ىزدەرىن جانە تۇرمىستىق نىسانداردى تىركەگەن.

زەرتتەۋ كەزىندە كەراميكا سىنىقتارى، جانۋار سۇيەكتەرى جانە مەتالل وڭدەۋگە قاتىستى جابدىق قالدىقتارى دا تابىلعان. بۇل ولجالار اتالعان اۋماقتا كەزىندە تۇراقتى ءومىر بولعانىن كورسەتەدى.

سونىمەن قاتار ارحەولوگتار قۇم استىنان ادام ارەكەتىنىڭ ىزدەرى ساقتالعان مادەني قاباتتى انىقتادى. مامانداردىڭ ايتۋىنشا، بۇل تۇرعىنداردىڭ ۇزاق ۋاقىت بويى قۇرىلىس جۇرگىزىپ، قونىستى قايتا جاڭعىرتىپ وتىرعانىنىڭ دالەلى.

قالا قيراندىلارى ماڭىنان شامامەن 5 مەتر تەرەڭدىكتە XIII–XIV عاسىرلارعا جاتاتىن مۇسىلمان قورىمى دا زەرتتەلگەن. جەرلەۋ ورىندارى يسلام داستۇرىنە ساي مەككە باعىتىنا قاراتىلىپ ورنالاستىرىلعان.

الدىن الا بولجام بويىنشا، كونە قونىس XV عاسىرداعى كۇشتى جەر سىلكىنىسىنىڭ سالدارىنان سۋ استىندا قالعان. ارحەولوگتار زەرتتەۋ جۇمىستارىن جالعاستىرىپ، تابىلعان نىسانداردىڭ تاريحي ماڭىزىن ناقتىلاۋدى جوسپارلاپ وتىر.