Qyrǧyzstandaǧy Ystyqköl kölınıŋ tübınen köne qalaǧa ūqsas nysandar anyqtalǧan, dep habarlaidy "Adyrna" ūlttyq portaly Econews-qa sıltep.
BAQ deregınşe, süŋguırler men arheologtar suasty ekspedisiiasy barysynda Toru-Aiǧyr maŋyndaǧy aumaqty zerttep, ortaǧasyrlyq qonystyŋ bolǧanyn rastaǧan. Ǧalymdar su astynan kırpışten qalanǧan ǧimarattardyŋ qaldyqtaryn, peş ızderın jäne tūrmystyq nysandardy tırkegen.
Zertteu kezınde keramika synyqtary, januar süiekterı jäne metall öŋdeuge qatysty jabdyq qaldyqtary da tabylǧan. Būl oljalar atalǧan aumaqta kezınde tūraqty ömır bolǧanyn körsetedı.
Sonymen qatar arheologtar qūm astynan adam äreketınıŋ ızderı saqtalǧan mädeni qabatty anyqtady. Mamandardyŋ aituynşa, būl tūrǧyndardyŋ ūzaq uaqyt boiy qūrylys jürgızıp, qonysty qaita jaŋǧyrtyp otyrǧanynyŋ dälelı.
Qala qirandylary maŋynan şamamen 5 metr tereŋdıkte XIII–XIV ǧasyrlarǧa jatatyn mūsylman qorymy da zerttelgen. Jerleu oryndary islam dästürıne sai Mekke baǧytyna qaratylyp ornalastyrylǧan.
Aldyn ala boljam boiynşa, köne qonys XV ǧasyrdaǧy küştı jer sılkınısınıŋ saldarynan su astynda qalǧan. Arheologtar zertteu jūmystaryn jalǧastyryp, tabylǧan nysandardyŋ tarihi maŋyzyn naqtylaudy josparlap otyr.
