الماتى مەتروسىندا جولاۋشىلار قاۋىپسىزدىگىن ارتتىرۋ ماقساتىندا پلاتفورمالىق ەسىكتەر ورناتۋ جوباسى قولعا الىندى، دەپ حابارلايدى "ادىرنا" ۇلتتىق پورتالى.
جوباعا سايكەس، مەترو ستانتسيالارىنا شىنىدان جاسالعان ارنايى قورشاۋلار قويىلادى. ولار پويىز كەلگەن كەزدە اۆتوماتتى تۇردە اشىلىپ، جولاۋشىلاردى رەلسكە قۇلاپ كەتۋدەن قورعايدى. سونىمەن قاتار، بۇل جۇيە شۋ مەن شاڭ دەڭگەيىن ازايتۋعا مۇمكىندىك بەرەدى.
جالپى قۇنى 7,1 ملرد تەڭگەدەن اساتىن جوبا مەترونىڭ ءبىرىنشى جەلىسىندەگى بارلىق ستانتسيالاردى قامتيدى. اتاپ ايتقاندا، «رايىمبەك باتىر» ستانتسياسىنان «باۋىرجان مومىشۇلى» ستانتسياسىنا دەيىنگى ارالىقتا ورناتىلادى. ال 2026 جىلدىڭ سوڭىندا اشۋ جوسپارلانعان «قالقامان» ستانتسياسى بۇل تىزىمگە ەنبەگەن.
قۇرىلىس جۇمىستارى مەترو جۇمىسى توقتايتىن تۇنگى ۋاقىتتا جۇرگىزىلەدى. مەردىگەر جۇمىستاردى بيۋدجەتتەن قارجى بولىنۋىنە قاراي كەزەڭ-كەزەڭىمەن اتقارادى. جوبانى تولىق اياقتاۋ مەرزىمى – 2027 جىلدىڭ 31 جەلتوقسانى.
كەلىسىمشارت تالاپتارىنا سايكەس، مەردىگەر بارلىق باعدارلامالىق قامتاماسىز ەتۋدى جانە تەحنيكالىق قۇجاتتامانى تاپسىرۋى ءتيىس. سونداي-اق ورناتىلعان جابدىقتىڭ كەمىندە 10 پايىزى كولەمىندە قوسالقى بولشەكتەر قورىن قامتاماسىز ەتىپ، انىقتالعان اقاۋلاردى ءوز ەسەبىنەن تۇزەتۋگە مىندەتتى.
