"Adyrna" ūlttyq portalynyŋ YouTube arnasyna İran suretşıler odaǧynyŋ müşesı, qazaqstandyq suretşı Aŋsaǧan Mūstafa qonaq boldy. Sūhbat barysynda öner, qoǧam, dın, jeke ömır jäne şyǧarmaşylyq joly turaly bırqatar maŋyzdy taqyryptar qozǧaldy.
Suretşı İranmen bailanysy jaily aityp, ol jaqtaǧy ärıptesterımen qarym-qatynasyn saqtap otyrǧanyn jetkızdı. Sonymen qatar, onyŋ bır tuyndysy Koreiadaǧy muzeige qoiylǧany da söz boldy.
Qoǧamdaǧy äiel rölıne toqtalǧan ol, keibır elderdegı qyzdardy şekteu men qysym körsetu mäselesın köterıp, äielderdı tömendetpei-aq olardyŋ mümkındıgın arttyru qajet ekenın atap öttı. Būl rette ol prodiuser Baian Maqsatqyzyn qoldaitynyn bıldırdı.
Öner men dınnıŋ araqatynasy turaly pıkır bıldırgen suretşı, kei jaǧdaida önerge qoiylatyn şekteulermen kelıspeitının aşyq aitty. Onyŋ aituynşa, suret saluǧa tyiym salu – mädeniet pen tarihqa ziian keltıruı mümkın.
Sūhbat soŋynda Aŋsaǧan Mūstafa 17 säuır künı Ūlttyq muzeide ötetın jeke körmesıne köpşılıktı şaqyrdy. Sondai-aq, "Plastika ART" baǧytymen ainalysyp jürgenın jäne 50-ge juyq qazaqtyŋ ūlttyq oiu-örnegın jinaqtaǧanyn jetkızdı.
