تەگەران ورمۇز بۇعازىنداعى يراندىق جانە امەريكالىق كۇشتەر اراسىنداعى سوققىلار الماسۋىنا بايلانىستى جەكسەنبىگە جوسپارلانعان ۆاشينگتونمەن تەحنيكالىق كەلىسسوزدەردى توقتاتتى. بۇل تۋرالى 28 ماۋسىمدا يراننىڭ بۇرىنعى جوعارعى كوشباسشىسىنىڭ كەڭسەسى وكىلى حابيبوللا فازاەلي مالىمدەدى، دەپ حابارلايدى «ادىرنا» ءتىلشىسى.
«تەحنيكالىق كەلىسسوزدەر ءوتۋى ءتيىس ەدى، الايدا يران وعان قاتىسۋدان باس تارتىپ، كەزدەسۋدى توقتاتتى. بۇعان سوڭعى كۇندەرى بولعان سوققىلار الماسۋى سەبەپ بولدى»، – دەدى فازاەلي.
ونىڭ ايتۋىنشا، تەگەران تەحنيكالىق كونسۋلتاتسيالاردى قايتا باستاماس بۇرىن بىرقاتار تالاپتىڭ ورىندالۋىن، سونىڭ ىشىندە بۇعاتتان شىعارىلعان اكتيۆتەرگە قول جەتكىزۋدى تالاپ ەتىپ وتىر.
ال يراننىڭ سىرتقى ىستەر ءمينيسترى ابباس اراكچي ورمۇز بۇعازىنداعى جاعدايعا كەز كەلگەن ارالاسۋ ايماقتاعى شيەلەنىستىڭ ودان ءارى ۋشىعۋىنا الىپ كەلەتىنىن مالىمدەدى.
28 ماۋسىمدا يران يسلام رەۆوليۋتسياسى ساقشىلار كورپۋسىنىڭ اسكەري-تەڭىز جانە اسكەري-اۋە كۇشتەرى اقش-تىڭ بۇعان دەيىن جاساعان سوققىلارىنا جاۋاپ رەتىندە كۋۆەيت پەن باحرەيندەگى امەريكالىق اسكەري نىساندارعا زىمىراندار مەن ۇشقىشسىز ۇشۋ اپپاراتتارى ارقىلى بىرلەسكەن شابۋىل جاساعان.
بۇعان دەيىن اقش اسكەرى ورمۇز بۇعازى ماڭىنداعى يرانمەن بايلانىستى نىساندارعا سوققى بەرگەن بولاتىن.
