ماڭعىستاۋ وبلىسىنىڭ ىشكى ساياسات باسقارماسى ۇلتتىق ۆاليۋتانىڭ 30 جىلدىعىنا وراي اقتاۋ جانە جاڭاوزەن قالالارىنداعى كوشەلەرگە ورنالاستىرىلاتىن 5 بيلبوردقا 1 339 285 تەڭگە ءبولدى، دەپ حابارلايدى «ادىرنا» ءتىلشىسى goszakup.gov.kz سايتىنا سىلتەمە جاساپ.
اتالعان تەندەر 17 قازان كۇنى جاريالانعان. مەملەكەتتىك ساتىپ الۋدىڭ اتاۋى "اقتاۋ جانە جاڭاوزەن قالالارىنىڭ كوشەلەرىندە ورنالاسقان بيلبوردتار ارقىلى قر ۇلتتىق ۆاليۋتاسىنىڭ قۇرىلۋ تاريحىمەن تانىستىرۋ قىزمەتى" دەپ اتالادى. قازىرشە، تەندەردى ۇتىپ الۋ ءۇشىن ءبىر عانا كومپانيا ۇمىتكەر رەتىندە قۇجاتتارىن تىركەگەن. جەڭىمپاز 24 قازان كۇنى انىقتالادى.
تەندەردى ۇتىپ العان كومپانيا اقتاۋ قالاسىندا 4 ء(تورت) بىرلىك جانە جاڭاوزەن قالاسىندا 1 ء(بىر) بىرلىك، بارلىعى 5 (بەس) بىرلىك بيلبورد ورناتۋعا، باننەر ەسكيزىن دايىنداۋ، باسىپ شىعارۋ، كونسترۋكتسيا جالداۋ، ورنالاستىرۋ، شەشىپ الۋ جانە ت.ب. قىزمەتتەردى اتقارۋعا مىندەتتەلگەن. سونداي-اق، تەحنيكالىق سيپاتتامادا بيلبوردتىڭ سىرتقى ءپىشىنى – 3ح6 كولەمىندە بولۋى كەرەكتىگى جازىلىپتى.
ەندى، ەسەپتەڭىز... 5 بيلبوردتىڭ جالپى ورتاق قۇنى 1 339 285 تەڭگە. دەمەك، ءار داناسى 267 285 تەڭگەگە جاسالادى دەگەن ءسوز.
ۇلتتىق ۆاليۋتانىڭ تاريحىن ناسيحاتتاۋ ءۇشىن بيۋدجەتتەن 1 339 285 تەڭگە قارجى ءبولىنىپ دايىندالعان سول 5 دانا بيلبورد، بار بولعانى ءبىر اي، ياعني 1 جەلتوقسانعا دەيىن عانا قالا كوشەلەرىندە ءىلىنىپ تۇرماق ەكەن.
قوش! ەندى ءبىزدى مىنا سۇراقتار مازالايدى...
1. ماڭعىستاۋ وبلىسىنىڭ ىشكى ساياسات باسقارماسى قر ۇلتتىق ۆاليۋتاسىنىڭ 30-جىلدىعىن نەلىكتەن ءبىر اي عانا ءىلىنىپ تۇراتىن 5 قانا بيلبوردپەن اتاپ وتپەك؟
2. ۇلتتىق ۆاليۋتانىڭ تاريحىن ەكى قالاعا ورناتىلعان بەس-اق بيلبوردتپەن حالىقتىڭ ساناسىنا قۇيۋ مۇمكىن بە؟
3. ماڭعىستاۋ وبلىسىنىڭ ىشكى ساياسات باسقارماسى ءۇشىن ءتول تەڭگەمىزدىڭ 30 جىلدىق مەرەكەسى ءھام تاريحى اقتاۋ مەن جاڭاوزەننەن باسقا اۋداندارعا قاجەت ەمەس پە؟
4. ءپىشىنى 3ح6 بيلبورد شىعارۋدىڭ ءھام ءىلۋدىڭ نارىقتاعى كوتەرمە قۇنى 50-60 مىڭ تەڭگەدەن اسپايدى. ەندەشە، نەلىكتەن ءار بيلبوردقا 267 285 مىڭ تەڭگە جۇمسالىپ وتىر؟
بۇل سۇراقتارعا اتالعان وبلىستىڭ ىشكى ساياسات باسقارماسى كوپ كەشىكتىرمەي جاۋاپ بەرىپ قالار دەپ ويلايمىز. ءبىز ارينە، ۇلتتىق ۆاليۋتامىز، ءتول تەڭگەمىزدىڭ 30 جىلدىق مەرەيتويىنىڭ اتالىپ وتۋىنە قارسى ەمەسپىز. 15 قاراشا كۇنى بولاتىن ۆاليۋتا كۇنىن باعاسى ۋداي 5 بيلبوردپەن جابا سالۋ كوڭىلگە كۇدىك ۇيالاتاتقانىن جاسىرا المايمىز!
قانات بىرلىكۇلى،
«ادىرنا» ۇلتتىق پورتالى
