جەتپىس ءتورت جاسار جۋسانباي وڭعارباەۆ اقساقالدى كەلىندەرى ۇيىنەن قۋىپ جىبەرگەن. بارار جەر، باسار تاۋى قالماعان اقساقال شاعىن تەمىرجول بەكەتىن پانالاعان. قاريا وزىنە قول ۇشىن سوزعان تەمىرجولشىلارمەن تىلدەسىپ، قارتتار ۇيىنە بارعىسى كەلەتىنىن، الايدا ءجون-جوسىعىن بىلمەيتىنىن جەتكىزدى. ءتىپتى، تاعدىر تاۋقىمەنىن تارتىپ، كوڭىلى قۇلازىعان اقساقالدىڭ ءنار تاتپاعانىنا بىرنەشە كۇن بولعان. بۇل تۋرالى جۋرناليست دانيار الىمقۇل ءوز پاراقشاسىندا حابارلادى، دەپ جازدى "ادىرنا" ۇلتتىق پورتالى.
جەلى قولدانۋشىلارى قارتايعان شاعىندا تايانىش بولار بالالارىنان تەپەرىش كورىپ، دالادا قالعان شۋ قالاسى تۇرعىنىنىڭ مۇڭ-مۇقتاجىن كوپشىلىككە جەتكىزدى. ۆيدەو اۆتورى حالىقتان كەڭەس سۇراپ، اقساقالدى بالا-شاعاسى تاستاپ كەتكەنىن ايتتى:
- قارتتار ۇيىنە بارۋعا كەلىسەسىز عوي؟.. بالا-شاعاسى بار، بىراق تاستاپ كەتكەن، - دەدى ۆيدەو اۆتور بۇل جايلى.
الايدا، اقساقالدىڭ قارتتار ۇيىنە قابىلدانۋى دا تۇيىتكىلى كوپ ماسەلە بولىپ شىقتى. وڭىردەگى قارتتار ءۇيى اقساقالدى قابىلداۋدان باس تارتقان. قازىر اۋداندىق اكىمشىلىك اقساقالعا بولىسىپ، ءتيىستى كومەك كورسەتىپ جاتىر. قاريانىڭ بولاشاقتا قايدا ورنالاساتىنى الماتىدان ارنايى شاقىرتىلعان تۋعان پەرزەنتى كەلگەندە بەلگىلى بولادى دەيدى ماماندار.
"ادىرنا" ۇلتتىق پورتالى
