تاليبان قوزعالىسىنىڭ وكىلى مەن اۋعانستان يسلام امىرلىگىنىڭ كەلىسسوز توبىنىڭ مۇشەسى مۇحاممەد سۋحايل شاحين وزبەكستان باسشىلىعىنىڭ اتىنا تاۋەلسىزدىكتىڭ 30 جىلدىعىنا وراي قۇتتىقتاۋ جولدادى. بۇل تۋرالى “ادىرنا” ۇلتتىق پورتالى حابارلايدى.
بۇل تۋرالى 1 قىركۇيەكتە وزبەكستان سىرتقى ىستەر مينيسترلىگىنىڭ رەسمي وكىلى يۋسۋپ كابۋلجانوۆ حابارلادى.
وزبەكستان سىرتقى ىستەر مينيسترلىگىنە جولدانعان قۇتتىقتاۋدا:
«ءبىز باۋىرلاس وزبەكستان ەلىنىڭ باسشىلىعى مەن حالقىن تاۋەلسىزدىك كۇنىمەن شىن جۇرەكتەن قۇتتىقتايمىز. ءبىز كورشىلەس وزبەكستانمەن جەمىستى جانە دوستىق قارىم -قاتىناس ورناتقىمىز كەلەدى ».
قۇتتىقتاۋدا سونداي -اق، تاليباننىڭ وزبەكستاننىڭ قاتىسۋىمەن اۋعانستاندا تەمىرجول مەن ەلەكتر جەلىلەرىن سالۋ جوبالارىن جۇزەگە اسىرۋعا مۇددەلى ەكەندىگى ايتىلادى.
«اۋعانستان يسلام امىرلىگى ءبىزدىڭ وزبەك سەرىكتەستەرگە وسى باعىتتا بارلىق قاجەتتى كومەكتى كورسەتەدى»، - دەلىنگەن قۇتتىقتاۋدا.
بۇل ارادا الەۋمەتتىك جەلىلەردىڭ وزبەك سەگمەنتىندە تاليباندار اۋعان مەكتەپتەرىندە وزبەك ءتىلىن وقىتۋعا تىيىم سالىپ، الىشەر ناۆوي ەسكەرتكىشتەرىن بۇزعانى تۋرالى بۇعان دەيىن حابارلانعان بولاتىن.
الايدا وزبەكستان سىرتقى ىستەر مينيسترلىگىنىڭ وكىلى يۋسۋپ كابۋلجانوۆ بۇل حابارلاردى «شىندىققا جاناسپايتىن» دەپ باعالاپ، ونى تاراتقانداردى سىنعا الدى.
