بۇگىن، 24 ناۋرىز الماتىدا قازاق باقسىلارىنىڭ تۇڭعىش قۇرىلتايى ءوتتى، دەپ حابارلايدى “ادىرنا” ۇلتتىق پورتالى Arasha.kz سايتىنا سىلتەپ.
اقپاراتقا سايكەس، قۇرىلتاي ءداستۇر بويىنشا ادام جانىن تازالاۋدان باستالدى. ول ءۇشىن قوبىزدان كۇي شەرتىلگەن.
قۇرىلتايدى تاريحشى، جازۋشى، اقىن، كومپوزيتور، ستسەناريست، رەجيسسەر، تەلەجۇرگىزۋشى، كورىپكەل ارمان نۇرمۇحانبەتوۆ جۇرگىزدى.
ونىڭ ايتۋىنشا، قۇرىلتايدى وتكىزۋگە دايىندالىپ جاتقاندا ءتۇرلى كەدەرگىلەر بولعان.
«قۇرىلتايدى ەكى ادەمى قىز جۇرگىزەدى دەپ جوسپارلاعانبىز. بىراق بىرەۋىنىڭ اناسى اۋىرىپ قالدى، ەكىنشىسى قورقىپ شىقپادى. سوندىقتان بۇگىن قۇرىلتايدى ءوزىم جۇرگىزەمىن دەدى»، – ول.
ارمان نۇرمۇحانبەتوۆ بۇگىنگى قۇرىلتايدىڭ ماقساتىنا توقتالىپ ءوتتى.
«بىرىنشىدەن، قاسيەت دەگەن قۇبىلىستى تىپتەن قاسيەتى بار ادامدار دا تۇسىنبەيدى. قاسيەت ارقىلى الدىمەن ەم سالامىز، جول اشامىز. قاسيەت دەگەن تەرەڭىرەك قۇبىلىس. ماسەلەن، قاسيەت جىراۋلاردا بولعان. ولار حاندارعا ءتۇيىنى جوق سۇراقتار بويىنشا كەڭەس بەرگەن. قاسيەت دەگەن تاڭىرشىلدىكتىڭ نەگىزى. شەبەرلەر، اقىندار، جىراۋلاردىڭ بارىندە قاسيەت بولعان، سولار ارقىلى ءبىزدىڭ مادەنيەتىمىز قالىپتاستى، سولار ارقىلى ۇلى دالانىڭ وركەنيەتى قالىپتاستى»، – دەيدى ارمان نۇرمۇحانبەتوۆ.
ايتا كەتەيىك، باقسىلىق – ءشامانيزمنىڭ وسى كۇنگە دەيىن جەتكەن سارقىنى. باقسى دەپ وزگە تىلسىم الەممەن بايلانىس ورناتىپ، ونداعى ءتۇرلى رۋحتارمەن بايلانىس جاساي الاتىن ادامدى ايتقان. باقسىلار «اۋليەلەردى» «ارۋاقتاردى»، «پەرىشتەلەردى» شاقىرىپ، ولارمەن تىلدەسە الادى، ادامنىڭ جاۋلارى – ءداۋ،پەرى،شايتان، الباستى، جىن، مارتۋ، تاعى باسقا مەن كۇرەسەدى دەگەن سەنىمدە بولعان. باقسىلارعا ءتان ەرەكشە قاسيەتتەردىڭ ءبىرى – ەمشىلىك (تاۋىپشىلىك). باقسىلاردىڭ ءبارى قوبىز تارتىپ، زىكىر سالىپ، ءتۇرلى ەمدەر جاسايدى. ونىڭ قامشىسى تيگەن ادامنىڭ دەنەسىنە كىرگەن شايتاندار قاشىپ، بارلىق سىرقاتىنان قۇلان-تازا جازىلىپ كەتەدى دەپ سەنگەن.
