بۇگىن، 3 ءساۋىر ساعات 11:30 شاماسىندا رەسپۋبليكالىق ماڭىزى بار «كەگەن – نارىنقول» اۆتوجولىنىڭ 20-شاقىرىمىندا ەرىگەن سۋدى وتكىزۋ كەزىندە قولدانىستاعى سۋ وتكىزگىش قۇبىر زاقىمدانىپ، جول وپىرىلدى، دەپ حابارلايدى "ادىرنا".
اتالعان ۋچاسكە بۇعان دەيىن سۋ تاسقىنى قاۋپى بار ايماقتار قاتارىنا جاتپاعان. قازىرگى ۋاقىتتا بۇل جول بولىگى ورتاشا جوندەۋ جۇمىستارىنىڭ جۇرگىزىلۋىنە بايلانىستى مەردىگەر ۇيىمنىڭ قاراۋىندا.
قازاۆتوجول مالىمەتىنشە، قوزعالىس ۋاقىتشا شەكتەلىپ، كولىكتەر قيىرشىقتاس جول ارقىلى اينالىپ وتۋدە. جاعداي باقىلاۋدا، شامامەن 20 بىرلىك ارنايى تەحنيكا جۇمىلدىرىلعان. جاقىن ارادا ۋاقىتشا قيىرشىقتاس اينالما جول سالۋ جوسپارلانۋدا.
سۋ وتكىزگىش قۇبىر مەن جول توسەمىن قالپىنا كەلتىرۋ جۇمىستارى ەرىگەن سۋدىڭ ءوتۋى تولىق اياقتالعاننان كەيىن باستالادى. اتالعان ۋچاسكەدەگى قوزعالىس تاۋلىگىنە شامامەن 500 اۆتوكولىكتى قۇرايدى. جول 1960–1970 جىلدارى سالىنعان.
