الماتى وبلىسىندا شەتەلدىك ەر ادام ساۋدا ورتالىعىندا 5 جاسار قىز بالانى تەپكەن، دەپ حابارلايدى “ادىرنا”.
23 شىلدە كۇنى الماتى وبلىسى قاراساي اۋدانىندا ورنالاسقان "Aport Mall" ساۋدا ورتالىعىندا شەتەلدىك ازامات ورەسكەل ارەكەتىمەن كامەرا ءتۇسىپ قالعان. بەينەباقىلاۋ كامەراسىندا ەر ادامنىڭ ايەل مەن ارباداعى بالاسىن ەرتىپ بارا جاتقانىن انىق كورۋگە بولادى. ءبىر كەزدە كىشكەنتاي قىز ارباعا جاقىنداي باستايدى. وسى ساتتە ەر ادام ارباعا جاقىنداعان ءبۇلدىرشىندى تەۋىپ، ارباداعى ءسابيدى كوتەرىپ العان.
"پوليتسياعا 1996 جىلى تۋعان ازاماتشا ك. 2019 جىلى تۋعان كىشكەنتاي قىزىنا دەنە جاراقاتىن سالعان بەلگىسىز ادامعا قاتىستى شارالار قابىلداۋ تۋرالى ءوتىنىش ءبىلدىردى. بۇل دەرەك بويىنشا "بۇزاقىلىق" دەرەگىمەن قىلمىستىق كودەكسىنىڭ 293-بابىنىڭ 1-بولىگى بويىنشا تىركەلدى. جەدەل-ىزدەستىرۋ ءىس - شارالارى بارىسىندا ءتارتىپ ساقشىلارى 1998 جىلى تۋعان تۇركيا رەسپۋبليكاسىنىڭ ازاماتىن انىقتاپ، پوليتسياعا جەتكىزدى", - دەدى الماتى وبلىسى پوليتسيا دەپارتامەنتىنىڭ باستىعى پولكوۆنيك باۋىرجان الەنوۆ.
"قازىرگى ۋاقىتتا ۇستالعان ەر ادام زاڭنامادا بەلگىلەنگەن تارتىپپەن ۋاقىتشا ۇستاۋ يزولياتورىنا قامالدى. ساراپتاما تاعايىندالىپ، بارلىق قاجەتتى تەرگەۋ ارەكەتتەرى جۇرگىزىلىپ جاتىر. قىلمىستىق كودەكستىڭ 201-بابىنا سايكەس وزگە مالىمەتتەر جاريا ەتۋگە جاتپايدى", - دەدى الماتى وبلىسى پوليتسيا دەپارتامەنتىنىڭ باسشىسى.
كۇدىكتى جاۋاپ الۋ كەزىندە بولعان وقيعانى تولىق ايتىپ، ءوز كىناسىن مويىنداپ وتىر.
