الماتىدا جالعان اقپارات تاراتتى دەگەن كۇدىكپەن 10 تاۋلىككە قامالعان بلوگەر ادىلەتحان مولداحاننىڭ تۋىستارى پرەزيدەنتكە، باس پروكۋراتۋرا مەن ىشكى ىستەر مينيسترلىگىنە اشىق حات جولداپ، ءىستى ءادىل ءارى وبەكتيۆتى تەرگەۋدى سۇرادى، دەپ حابارلايدى "ادىرنا" ۇلتتىق پورتالى.
تۋىستارىنىڭ مالىمەتىنشە، بلوگەر قازىرگى ۋاقىتتا الماتىداعى سي-8 تەرگەۋ يزولياتورىنا اۋىستىرىلعان. وعان قاتىستى تاعايىندالعان ساراپتاما ناتيجەسى 9 ساۋىرگە دەيىن شىعۋى ءتيىس. وسى قورىتىندى نەگىزىندە ونىڭ ارەكەتىندە قىلمىس قۇرامى بار-جوعى انىقتالادى.
ء«بىز باس پروكۋراتۋرا مەن ىشكى ىستەر مينيسترلىگىنەن ادىلدىكتى تالاپ ەتەمىز. ونى تەك مەملەكەتتىك ۇستانىمعا قايشى پىكىر بىلدىرگەنى ءۇشىن جالعان اقپارات تاراتۋشى رەتىندە جازالاۋعا بولمايدى»، – دەلىنگەن حاتتا.
جاقىندارىنىڭ ايتۋىنشا، ادىلەتحان مولداحان بۇرىن پوليتسيا قىزمەتكەرى بولعان جانە زاڭگەرلىك ءبىلىمى بار. سوندىقتان ول جالعان اقپارات تاراتۋدىڭ قۇقىقتىق سالدارىن جاقسى تۇسىنەدى.
الدىن الا مالىمەت بويىنشا، ءىس قر قىلمىستىق كودەكسىنىڭ 274-بابى 2-بولىگى 3-تارماعى («بۇقارالىق اقپارات قۇرالدارىن نەمەسە ينتەرنەت ارقىلى جالعان اقپارات تاراتۋ») بويىنشا تەرگەلۋى مۇمكىن. بۇل باپتا ايىپپۇل سالۋ نەمەسە ءۇش جىلعا دەيىن باس بوستاندىعىن شەكتەۋ نە ايىرۋ جازاسى قاراستىرىلعان.
تۋىستارى بلوگەردىڭ «باسقالارعا ەسكەرتۋ رەتىندە قولدانىلۋىنان» قاۋىپتەنەتىنىن ايتىپ، تەرگەۋدىڭ اشىق ءارى ءادىل ءوتۋىن تالاپ ەتتى. سونداي-اق ولار مەملەكەت باسشىسى قاسىم-جومارت توقاەۆتان ءىستى جەكە باقىلاۋعا الۋدى سۇرادى.
