ۇلتتىق قوردان تاعى 800 ملرد تەڭگە الىنادى. بۇل جايلى سەناتتىڭ جالپى وتىرىسىندا ۇلتتىق ەكونوميكا ۆيتسە-ءمينيسترى باۋىرجان وماربەكوۆ حابارلادى. سونىمەن قاتار، مينيستر ورىنباسارى 2023 جىلعا ارنالعان ەل بيۋدجەتىن جۇمساۋدىڭ ءجون-جاپسارىمەن تانىستىردى، حابارلايدى "ادىرنا" ۇلتتىق پورتالى قازاقپارات-قا سىلتەمە كورسەتە وتىرىپ.
«2023 جىلى رەسپۋبليكالىق بيۋدجەتتىڭ كىرىستەرى بەكىتىلگەن جوسپاردان 720 ملرد تەڭگەگە وسە وتىرىپ، ءجىو-ءنىڭ 12,1% نەمەسە 14,6 ترلن تەڭگە دەڭگەيىندە بولجانىپ وتىر. رەسپۋبليكالىق بيۋدجەتكە قوسىمشا تۇسىمدەر كىرىس بازاسىن ۇلعايتۋ، سالىقتىق جانە كەدەندىك اكىمشىلەندىرۋدى جاقسارتۋ، تسيفرلاندىرۋ بويىنشا ۇكىمەت قابىلداپ وتىرعان شارالار ەسەبىنەن قامتاماسىز ەتىلەدى»، - دەدى ۆيتسە-مينيستر.
ناقتىراق ايتساق، بيۋدجەت كىرىسى بىرجولعى تۇسىمدەر ەسەبىنەن 316 ملرد تەڭگەگە، سالىقتىق جانە كەدەندىك اكىمشىلەندىرۋدى جاقسارتۋ ەسەبىنەن 404 ملرد تەڭگەگە ۇلعاتىلماق.
«سونىمەن قاتار، ۇلتتىق دەڭگەيدەگى الەۋمەتتىك ماڭىزى بار جوبالاردى جانە ستراتەگيالىق ماڭىزدى ينفراقۇرىلىمدىق جوبالاردى قارجىلاندىرۋ ءۇشىن ۇلتتىق قوردان 800 ملرد تەڭگە كولەمىندە نىسانالى ترانسفەرت قوسىمشا تارتىلادى. 2023 جىلى بيۋدجەت تاپشىلىعىن 3,2 ترلن تەڭگە كولەمىندە نەمەسە ءجىو-ءنىڭ 2,7% دەڭگەيىندە ساقتاۋ ۇسىنىلادى. وسىنى ەسكەرە وتىرىپ، رەسپۋبليكالىق بيۋدجەتتىڭ شىعىستارى بەكىتىلگەن كولەمنەن 1,5 ترلن تەڭگەگە ۇلعايىپ، 22,5 ترلن تەڭگەنى قۇرايدى»، - دەدى باۋىرجان وماربەكوۆ.
"ادىرنا" ۇلتتىق پورتالى
