"سۇڭقار" زىمىران-تاسىعىشىن بايقوڭىر عارىش ايلاعى اۋماعىنداعى بايتەرەك كەشەنى ستارتتىق الاڭىنا شىعارۋ مەرزىمى تاعى دا كەيىنگە قالدىرىلدى، دەپ حابارلايدى "ادىرنا" ۇلتتىق پورتالى قازتاگ-قا سىلتەپ.
دەرەككوزدىڭ مالىمەتىنشە، زىمىراندى الاڭعا شىعارۋ 29 ناۋرىزدان 31 ناۋرىزعا اۋىستىرىلعان. وسىعان بايلانىستى العاشقى سىناقتىق ۇشىرۋ كۇنى دە وزگەردى. ەندى زىمىراننىڭ العاشقى ۇشۋى 4 ءساۋىر كۇنى ساعات 16:00-دە (استانا ۋاقىتىمەن) رەزەرۆتىك كۇن رەتىندە جوسپارلانعان. قوسىمشا تەكسەرىستەر قاجەت بولعان جاعدايدا، كەلەسى رەزەرۆتىك كۇن – 5 ءساۋىر قاراستىرىلعان.
بۇدان الدىن «سۇڭقار» زىمىرانىن ۇشىرۋ الدىمەن 27 ناۋرىزعا جوسپارلانىپ، كەيىن 29 ناۋرىزعا شەگەرىلگەن. ودان كەيىن ۇشىرۋ مەرزىمى 30 ناۋرىز بەن 3 ءساۋىر ارالىعىنداعى رەزەرۆتىك كۇندەرگە شەگەرىلۋى مۇمكىن دەلىندى.
زىمىران ۇشاتىن "بايتەرەك" عارىشتىق زىمىران كەشەنى – قازاقستان مەن رەسەيدىڭ بىرلەسكەن جوباسى. بايقوڭىرداعى №45 ۇشىرۋ الاڭى نەگىزىندە جاساقتالعان جوبا ەكولوگيالىق تازا وتىنمەن جۇمىس ىستەيتىن زىمىرانداردى ۇشىرۋعا ارنالعان ينفراقۇرىلىم قۇرۋ ماقساتىن كوزدەيتىنى ايتىلادى. جوبا 2004 جىلى باستالىپ، 2005 جىلى سول كەزدەگى پرەزيدەنتتەر نۇرسۇلتان نازارباەۆ پەن ۆلاديمير ءپۋتيننىڭ قاتىسۋىمەن رەسمي تۇردە ىسكە قوسىلعان بولاتىن.
ايتا كەتۋ كەرەك، رەسەيدە — «سويۋز-5»، قازاقستاندا «سۇڭقار» اتالاتىن بۇل الىپ قۇرال — ورتا كلاستى، ەكى ساتىلى زىمىران. ول ەكولوگيالىق قاۋىپسىز وتىن — نافتيل مەن سۇيىق وتتەگىن پايدالانادى. جوبا ءساتتى جۇزەگە اسقان جاعدايدا، قازاقستاننىڭ عارىش سالاسىنداعى الەۋەتىن ارتتىرىپ، حالىقارالىق ۇشىرۋ نارىعىنداعى ورنىن كۇشەيتۋگە مۇمكىندىك بەرەدى دەپ حابارلانعان.
ايتا كەتەيىك، بۇعان دەيىن رەسەيلىك باق-تىڭ زىمىران اتاۋىنا قاتىستى پىكىر جاريالاعان ەدىك. ال بىلتىر بايقوڭىرداعى گاگارين ستارت الاڭىنىڭ ورنىنان كونە وركەنيەت وشاعى تابىلعانى حابارلانعان بولاتىن.
