فوتو: Blue Origin
امەريكالىق Blue Origin كومپانياسى New Glenn زىمىرانىن ەكىنشى رەت ۇشىرىپ، ونىڭ ءبىرىنشى ساتىسىن العاش رەت ءساتتى قوندىردى. 14 قاراشادا كاناۆەرال مۇيىسىنەن جۇزەگە اسقان ۇشىرىلىم بارىسىندا زىمىران NASA-نىڭ مارسياندىق ESCAPADE ميسسياسىن وربيتاعا شىعاردى، دەپ حابارلايدى "ادىرنا".
ۇشۋدان ءۇش مينۋت وتكەن سوڭ جەتى BE-4 قوزعالتقىشىمەن جۇمىس ىستەيتىن ءبىرىنشى ساتى ءبولىنىپ، اتلانت مۇحيتىنداعى Jacklyn تەڭىز پلاتفورماسىنا ءدال قوندى. بۇعان دەيىنگى NG-1 ۇشىرىلىمىندا ساتىنىڭ قوزعالتقىشتارى قايتا ىسكە قوسىلماعان ەدى.
نەگىزگى جۇك – مارس اتموسفەراسىنىڭ كۇن جەلىمەن ارەكەتتەسۋىن زەرتتەۋگە ارنالعان ESCAPADE ميسسياسى. Rocket Lab كومپانياسى جاساعان Blue جانە Gold دەپ اتالاتىن ەكى اپپارات ۇشىرىلعاننان كەيىن 33 مينۋت وتكەن سوڭ جوعارعى ساتىدان ءبولىندى. ارقايسىسىنىڭ سالماعى شامامەن 535 كيلوگرامم. قوسىمشا جۇك رەتىندە NASA-نىڭ بولاشاق كوممەرتسيالىق بايلانىس جۇيەلەرىنە ارنالعان Viasat كومپانياسىنىڭ تاجىريبەلىك ءمودۋلى شىعارىلدى.
ESCAPADE ميسسياسى باستاپقىدا Psyche زوندىمەن بىرگە ۇشىرىلۋى ءتيىس بولعان. الايدا جوبانىڭ كەيىنگە قالدىرىلۋىنا بايلانىستى اپپاراتتاردى قايتا جوبالاپ، جاڭا ۇشىرىلىم – New Glenn ارقىلى جۇزەگە اسىرۋ تۋرالى شەشىم قابىلداندى. مارسقا ءداستۇرلى تەرەزەنى كۇتپەۋ ءۇشىن اپپاراتتار اۋەلى جەردەن 1,5 ميلليون شاقىرىم قاشىقتىقتاعى L2 لاگرانج نۇكتەسىنە بارادى. وندا شامامەن ءبىر جىل تۇرىپ، 2026 جىلدىڭ سوڭىندا مارسقا بەت الادى. قىزىل عالامشارعا 2027 جىلدىڭ قىركۇيەگىندە جەتەدى. ميسسيانىڭ جوسپارلانعان ۇزاقتىعى – كەمىندە ءۇش جىل.
Blue Origin ءۇشىن بۇل ۇشىرىلىم ماڭىزدى كەزەڭ سانالادى. كومپانيا العاش رەت NASA-نىڭ عىلىمي جۇگىن وربيتاعا شىعارىپ، New Glenn زىمىرانىنىڭ قايتا پايدالانۋعا جارامدى ءبىرىنشى ساتىسىن كورسەتىپ بەردى.
