جۇيىتكىگەن پويىزدى باسقاراپ، قانشاما حالىقتى بارار جەرىنە امان-ساۋ جەتكىزىپ، پويىزدىڭ ءار تەمىرىنە مۇقيات بولۋ تەمىرجولشىلاردىڭ مىندەتى. بۇل سالادا ايانباي تەر توككەن ادامداردىڭ ەڭبەگى قاي كەزدە دە ەلەۋسىز قالمايدى. قىزىعىنان قيىندىعى باسىم سالانىڭ جىلىگىن شاعىپ، مايىن ىشكەن ماماندارعا حالىقتىڭ دا العىسى شەكسىز. سونداي جاننىڭ ءبىرى – ەل ىقىلاسىنا بولەنگەن ارىستىق وماروۆ تالعات ابدىسامەتۇلى. “ادىرنا” ۇلتتىق پورتالىنىڭ ءتىلشىسى تەمىرجولشىنى مەرەكەمەن قۇتتىقتاپ، ماماندىعىنىڭ قىر-سىرىن سۇراپ الدى.
تالعات تۇركىستان وبلىسى ارىس قالاسىنىڭ تۋماسى. ونىڭ تەمىر جول سالاسىندا قىزمەت ەتكەنىنە بيىل 38 جىل. ايتۋىنشا، ەڭ العاشقى قىزمەتىن تەمىرجولدا سلەسار بولۋدان باستاعان.
“10 سىنىپتى بىتىرگەننەن كەيىن اسكەرگە باردىم. كەيىن دەپوعا سلەسار بولىپ جۇمىسقا تۇردىم. ءبىر جەردە تۇرا بەرمەي، ءوسۋدى قالادىم. سوندىقتان تەپلوۆوز كومەكشىسى بولۋ ءۇشىن قىسقا مەرزىمدى 2 ايلىق كۋرستان ءوتىپ، جۇمىسقا تۇردىم. 90-شى جىلدارى ماشينيست بولىپ وقىپ، سول سالادا قىزمەت ەتۋدى باستادىم. قازىر پويىز ايدايمىن”،- دەيدى ول.
سول كەزدەن باستاپ ونىڭ تەمىرجول سالاسىنداعى تابىستى ەڭبەك جولى جالعاسىن تاپتى. ەڭبەكقورلىعىمەن، تياناقتىلىعىمەن كوزگە ءتۇستى. ءوز ءىسىنىڭ ناعىز مامانىنا اينالا ءبىلدى.
حالىق - امانات
56 جاستاعى تالعات پويىز ايداۋدىڭ قاۋىپ-قاتەرى كوپ دەيدى. ويتكەنى، حالىقتى ارقالاعان پويىزدى باسقارۋ وڭايعا سوقپايدى.
“ۇنەمى جۇمىسقا شىعاردا ءبىر اللاعا سيىنىپ شىعامىن. ويتكەنى، ماماندىعىم جاۋاپكەرشىلىكتى قاجەت ەتەدى. قانشاما ادامنىڭ ءومىرى سەنىڭ قولىڭدا تۇرعانداي بولادى. سوندىقتان ۇنەمى ساقتىقپەن قىزمەت ەتەمىن. ءبىر ساتتە قاتەلەسۋگە بولمايدى. حالىق - امانات. سوندىقتان قىزمەتكە بارعان ءار كۇنىمدى قۋانىشقا تولتىرعىم كەلەدى. ۇيدەگى وتباسىم دا الاڭداپ وتىرادى. الايدا، جۇمىسىمدى جاقسى كورگەندىكتەن قىزىعى مەن شىجىعىنا شىداپ كەلەمىن. ماماندىق تاڭداعاندا ويلانىپ تاڭداۋ قاجەت. سوندىقتان جاستارعا ايتىرىم: تەمىرجولعا كەلسەڭدەر، ۇناتىپ كەلىڭدەر. ماماندىقتارىڭا دەگەن قۇرمەتتەرىڭ بولسىن”، - دەيدى تالعات.
ەلەنگەن ەڭبەك
بىلىكتى ماماننىڭ كوپ جىلعى ەسەلى ەڭبەگى ەلەۋسىز قالعان ەمەس. ەلگە سىيلى، حالقىنا قادىرلى اعامىز ارقاشان دا قۇرمەت تورىنەن الاسارمايدى، ۇنەمى ۇجىمداستارىنا قادىرلى ازامات بىلىكتىلىگىمەن ەلەنىپ ءجۇر. ەسەلى ەڭبەگىنىڭ ارقاسىندا 2015 جىلى اسقار ماميننەن “قوزعالىس قاۋىپسىزدىگى” ءۇشىن ماراپاتقا يە بولدى. ودان بولەك، وبلىس-اۋدان اكىمدەرىنىڭ العىس حاتتارىمەن ماراپاتتالعان.
“وسى قىزمەتكە جەتكىزىپ، باعالاپ جاتقان قتج-عا العىسىم شەكسىز! ەكىنشى وتباسىما اينالعان تەمىرجولدىڭ قىزمەتكەرلەرىن مەرەكەمەن قۇتتىقتايمىن. تەمىرجولدا جۇمىس ىستەۋ دەنساۋلىقتى قاجەت ەتەدى. سوندىقتان بارلىق ارىپتەستەرىمە دەنساۋلىق تىلەيمىن!
الداعى ۋاقىتتا ەلىمىزدە تەمىر جولدا كوپ جۇمىس بولسا ەكەن. جاستار جۇمىسقا كىرىپ، وتباسىنى اسىراي السا ەكەن دەپ تىلەيمىن”، دەپ بولاشاق تەمىرجول قىزمەتكەرلەرىنە تىلەگىن ايتتى.
بالالارىم تەمىرجولدا قىزمەت ەتسە دەپ ارماندايمىن
تالعات جۇبايىمەن وتباسىلى بولعانىنا 32 جىل بولعان. قازىردە 9 بالانىڭ اكەسى. وتباسىن تەمىرجولدا ءجۇرىپ اسىراعان ول بۇگىندە ماماندىعىن ماقتان تۇتادى. ءتىپتى، بالالارىنا تەمىرجول سالاسىندا قىزمەت ەتۋگە كەڭەس بەرەدى ەكەن.
“5 قىز، 4 ۇلىم بار. 4 قىزىمدى ۇياسىنا ۇشىرىپ، 3 ۇلىمدى ۇيلەندىردىم. وسىنىڭ بارلىعى تەمىرجولدىڭ ارقاسى. ونداعى ءاربىر ماڭداي تەرىممەن تاپقان ەڭبەگىمدى وتباسىما ارنادىم. مەنىڭ ءبىر ارمانىم بار. بالالارىمنىڭ ءبىرى تەمىرجولدا ىستەسە ەكەن. ويتكەنى، تەمىرجول - توقتاۋسىز قىزمەت ەتەتىن جۇمىس ءتۇرى عوي”، - دەدى ول ىشىندەگىسىن جاسىرماي.
بۇگىندە بەرەكە دارىعان اۋلەتتەن تاراعان توعىز بالانىڭ جەتەۋى ءبىر-ءبىر ءۇي بولىپ، ءوز سالاسىندا تابىستى ەڭبەك ەتۋدە. قازىرگى تاڭدا تالعات ارىس قالاسىندا بالالارىنا اقىلشى اكە، نەمەرەلەرىنە قامقور اتا بولىپ، مامىراجاي تۇرمىس كەشۋدە. ەسەلى ەڭبەكتىڭ ورەسىنە شىققان تەمىرجولشى كوپ جىلعى بەينەتىنىڭ زەينەتىن كەلەسى جىلى كورمەك. تەمىرجولشىنى مەرەكەسىمەن “ادىرنا” ۇجىمى شىن جۇرەكتەن قۇتتىقتاپ، ىسىنە تابىس تىلەيدى!
دانا نۇرمۇحانبەت
“ادىرنا” ۇلتتىق پورتالى
