Jüiıtkıgen poiyzdy basqarap, qanşama halyqty barar jerıne aman-sau jetkızıp, poiyzdyŋ är temırıne mūqiiat bolu temırjolşylardyŋ mındetı. Būl salada aianbai ter tökken adamdardyŋ eŋbegı qai kezde de eleusız qalmaidy. Qyzyǧynan qiyndyǧy basym salanyŋ jılıgın şaǧyp, maiyn ışken mamandarǧa halyqtyŋ da alǧysy şeksız. Sondai jannyŋ bırı – el yqylasyna bölengen arystyq Omarov Talǧat Äbdısametūly. “Adyrna” ūlttyq portalynyŋ tılşısı temırjolşyny merekemen qūttyqtap, mamandyǧynyŋ qyr-syryn sūrap aldy.
Talǧat Türkıstan oblysy Arys qalasynyŋ tumasy. Onyŋ temır jol salasynda qyzmet etkenıne biyl 38 jyl. Aituynşa, eŋ alǧaşqy qyzmetın temırjolda slesar boludan bastaǧan.
“10 synypty bıtırgennen keiın äskerge bardym. Keiın Depoǧa slesar bolyp jūmysqa tūrdym. Bır jerde tūra bermei, ösudı qaladym. Sondyqtan teplovoz kömekşısı bolu üşın qysqa merzımdı 2 ailyq kurstan ötıp, jūmysqa tūrdym. 90-şy jyldary maşinist bolyp oqyp, sol salada qyzmet etudı bastadym. Qazır poiyz aidaimyn”,- deidı ol.Sol kezden bastap onyŋ temırjol salasyndaǧy tabysty eŋbek joly jalǧasyn tapty. Eŋbekqorlyǧymen, tiianaqtylyǧymen közge tüstı. Öz ısınıŋ naǧyz mamanyna ainala bıldı.
Halyq - amanat
56 jastaǧy Talǧat poiyz aidaudyŋ qauıp-qaterı köp deidı. Öitkenı, halyqty arqalaǧan poiyzdy basqaru oŋaiǧa soqpaidy.
“Ünemı jūmysqa şyǧarda bır Allaǧa siynyp şyǧamyn. Öitkenı, mamandyǧym jauapkerşılıktı qajet etedı. Qanşama adamnyŋ ömırı senıŋ qolyŋda tūrǧandai bolady. Sondyqtan ünemı saqtyqpen qyzmet etemın. Bır sätte qatelesuge bolmaidy. Halyq - amanat. Sondyqtan qyzmetke barǧan är künımdı quanyşqa toltyrǧym keledı. Üidegı otbasym da alaŋdap otyrady. Alaida, jūmysymdy jaqsy körgendıkten qyzyǧy men şyjyǧyna şydap kelemın. Mamandyq taŋdaǧanda oilanyp taŋdau qajet. Sondyqtan jastarǧa aityrym: temırjolǧa kelseŋder, ūnatyp kelıŋder. Mamandyqtaryŋa degen qūrmetterıŋ bolsyn”, - deidı Talǧat.
Elengen eŋbek
Bılıktı mamannyŋ köp jylǧy eselı eŋbegı eleusız qalǧan emes. Elge syily, halqyna qadırlı aǧamyz ärqaşan da qūrmet törınen alasarmaidy, ünemı ūjymdastaryna qadırlı azamat bılıktılıgımen elenıp jür. Eselı eŋbegınıŋ arqasynda 2015 jyly Asqar Maminnen “Qozǧalys qauıpsızdıgı” üşın marapatqa ie boldy. Odan bölek, oblys-audan äkımderınıŋ alǧys hattarymen marapattalǧan.“Osy qyzmetke jetkızıp, baǧalap jatqan QTJ-ǧa alǧysym şeksız! Ekınşı otbasyma ainalǧan temırjoldyŋ qyzmetkerlerın merekemen qūttyqtaimyn. Temırjolda jūmys ısteu densaulyqty qajet etedı. Sondyqtan barlyq ärıptesterıme densaulyq tıleimın! Aldaǧy uaqytta elımızde temır jolda köp jūmys bolsa eken. Jastar jūmysqa kırıp, otbasyny asyrai alsa eken dep tıleimın”, dep bolaşaq temırjol qyzmetkerlerıne tılegın aitty.
Balalarym temırjolda qyzmet etse dep armandaimyn
Talǧat jūbaiymen otbasyly bolǧanyna 32 jyl bolǧan. Qazırde 9 balanyŋ äkesı. Otbasyn temırjolda jürıp asyraǧan ol bügınde mamandyǧyn maqtan tūtady. Tıptı, balalaryna temırjol salasynda qyzmet etuge keŋes beredı eken.“5 qyz, 4 ūlym bar. 4 qyzymdy ūiasyna ūşyryp, 3 ūlymdy üilendırdım. Osynyŋ barlyǧy Temırjoldyŋ arqasy. Ondaǧy ärbır maŋdai terımmen tapqan eŋbegımdı otbasyma arnadym. Menıŋ bır armanym bar. Balalarymnyŋ bırı temırjolda ıstese eken. Öitkenı, temırjol - toqtausyz qyzmet etetın jūmys türı ǧoi”, - dedı ol ışındegısın jasyrmai.Bügınde bereke daryǧan äuletten taraǧan toǧyz balanyŋ jeteuı bır-bır üi bolyp, öz salasynda tabysty eŋbek etude. Qazırgı taŋda Talǧat Arys qalasynda balalaryna aqylşy äke, nemerelerıne qamqor ata bolyp, mamyrajai tūrmys keşude. Eselı eŋbektıŋ öresıne şyqqan temırjolşy köp jylǧy beinetınıŋ zeinetın kelesı jyly körmek. Temırjolşyny merekesımen “Adyrna” ūjymy şyn jürekten qūttyqtap, ısıne tabys tıleidı!
Dana Nūrmūhanbet
“Adyrna” ūlttyq portaly
Ūqsas jaŋalyqtar
