باتىس قازاقستان وبلىسى اۋماعىندا ۇشقىشسىز ۇشۋ اپپاراتىنىڭ قۇلاعانى تۋرالى اقپارات تارادى، دەپ حابارلايدى «ادىرنا» ءتىلشىسى.
وبلىستىق پوليتسيا دەپارتامەنتىنىڭ مالىمەتىنشە، قازىرگى ۋاقىتتا ۋاكىلەتتى قىزمەتتەرمەن بىرلەسىپ، اقجايىق اۋدانىندا ۇشقىشسىز ۇشۋ اپپاراتىنىڭ سىنىقتارىنا ۇقساس زاتتاردىڭ تابىلۋىنا بايلانىستى تەكسەرۋ شارالارى جۇرگىزىلىپ جاتىر.
«اتالعان نىسان ەلدى مەكەننەن تىس جەردە تابىلدى. وقيعانىڭ بارلىق ءمان-جايى انىقتالۋدا»،– دەدى دەپارتامەنتتىڭ ءباسپاسوز قىزمەتى.
تۇرعىنداردىڭ ايتۋىنشا، ۇشقىشسىز ۇشۋ اپپاراتى قاراۋىلتوبە اۋىلىنىڭ ماڭىنا قۇلاعان.
بۇل وڭىردەگى العاشقى جاعداي ەمەس. 2025 جىلدىڭ كۇزىندە ءبورلى اۋدانىنداعى قىزىلتال اۋىلى ماڭىندا جاۋىنگەرلىك زارياد ورناتىلعان درون جارىلىپ، وقيعا ورنىندا شۇڭقىر قالعان. سول كەزدە كورشىلەس ورىنبور وبلىسىندا اۋە دابىلى جاريالانعان. بۇعان دەيىن دە وسىنداي وقيعالار تىركەلگەن. ناۋرىز ايىندا جانىبەك جانە تاسقالا اۋداندارىندا، ال ءبىر اي بۇرىن بوكەيوردا اۋدانىندا درونداردىڭ قۇلاۋى بايقالعان.
