«اقجايىق» مەملەكەتتىك تابيعي رەزەرۆاتى اۋماعىنداعى ءورت سالدارىن جويۋ جونىندەگى جەدەل شتابتىڭ كوشپەلى وتىرىسى ءوتتى.
قازىرگى ۋاقىتتا شىمتەزەك قاباتتارىنىڭ جانىپ جاتقان وشاقتارىن ءسوندىرۋ جۇمىستارى جالعاسىپ جاتىر.
جەدەل مالىمەتتەرگە سايكەس، قازىرگى كەزدە اشىق جالىن وشاقتارى تىركەلمەگەن – ءورت وقشاۋلانعان. نەگىزگى كۇش شىمتەزەك پەن قامىستىڭ تلەۋىن تولىق سوندىرۋگە باعىتتالعان. جۇمىستار تاۋلىك بويى جۇرگىزىلۋدە. قايتا جانۋدىڭ الدىن الۋ ماقساتىندا ورتەنگەن اۋماقتار سۋ قۇيىلىپ، توپىراقپەن جابىلۋدا.
ءورتتىڭ سالدارىن جويۋعا شامامەن 150 ادام، 40 تەحنيكا بىرلىگى جانە 2 تىكۇشاق جۇمىلدىرىلعان. وتىرىستا توتەنشە جاعدايلار دەپارتامەنتىنىڭ باستىعى نۇرلان جاناباەۆ پەن وبلىس اكىمىنىڭ ورىنباسارى قايرات نۇرتاەۆ قازىرگى جاعداي مەن قابىلدانىپ جاتقان شارالار بويىنشا بايانداما جاسادى.
وبلىس اكىمى بارلىق جانۋ وشاقتارى تولىعىمەن جويىلعانشا جۇمىستى باسەڭدەتپەۋدى، جاعدايدى تۇراقتى باقىلاۋدا ۇستاۋدى جانە بارلىق قىزمەتتەردىڭ تولىق ۇيلەسىمدى جۇمىسىن قامتاماسىز ەتۋدى تاپسىردى.
ءورت وشاعىن باقىلاۋ مەن وقشاۋلاۋ تيىمدىلىگىن ارتتىرۋ ماقساتىندا جىلۋ تۇسىرگىشپەن جابدىقتالعان درون قولدانىلۋدا. ينفراقىزىل ءتۇسىرىلىم اۋماقتىڭ جوعارى تەمپەراتۋرالى بولىكتەرىن، سونىڭ ىشىندە شىمتەزەكتىڭ تەرەڭ قاباتتارىنداعى تلەۋ وشاقتارىن انىقتاۋعا مۇمكىندىك بەرەدى. بۇل اسىرەسە قول جەتۋى قيىن ايماقتاردا وتە ماڭىزدى.
جىلۋ تۇسىرگىشتى درون قولدانۋ مۇمكىندىگى:
- جاسىرىن جانۋ وشاقتارىن جەدەل انىقتاۋ;
- جوعارى تەمپەراتۋرالى ايماقتاردى ءدال بەلگىلەۋ;
- كۇش پەن تەحنيكانى باسىم باعىتتارعا جىبەرۋ;
- ءورتتىڭ قايتا تۇتانۋىن الدىن الا ەسكەرتۋ.
وتىرىستا وبلىس اكىمى ءورتتىڭ شىعۋ سەبەپتەرىنە قاتىستى پىكىر ءبىلدىردى:
«الەۋمەتتىك جەلىلەردە «اقجايىق» رەزەرۆاتى اۋماعىنداعى ورتكە قاتىستى ءتۇرلى نۇسقالار تاراپ جاتىر. وسىعان بايلانىستى مەنىڭ تاپسىرماممەن بارلىق جاعدايلار مەن بولجامدار ءتيىستى ورگاندار تاراپىنان مۇقيات تەكسەرىلۋدە. ەگەر ءورت ادامنىڭ — اسىرەسە قاساقانا ارەكەتىنىڭ سالدارىنان شىققانى دالەلدەنسە، كىنالىلەر زاڭعا سايكەس جاۋاپكەرشىلىككە تارتىلادى»، — دەدى ءوڭىر باسشىسى.
تەكسەرۋ بارىسى تۋرالى جۇرتشىلىق پەن بۇقارالىق اقپارات قۇرالدارىنا قوسىمشا اقپارات بەرىلەتىنى ايتىلدى.
سەرىك شاپكەنوۆ «اقجايىقتاعى» ءورت – باقىلاۋ تاريحىنداعى ەڭ ۇزاققا سوزىلعانداردىڭ ءبىرى بولعانىن جانە بۇل بىرقاتار جۇيەلى ماسەلەلەردى ايقىن كورسەتكەنىن اتاپ ءوتتى.
«كاسپيدىڭ تارتىلۋى مەن اۋماقتىڭ قاتتى قامىستانۋى — بۇل ماسەلەنىڭ بولاشاقتا ءوڭىر ءۇشىن ۇلكەن سىن بولاتىنىن كورسەتەدى. ءبىز بۇل ماسەلەگە جۇيەلى تۇردە قاراۋىمىز قاجەت. ءورتتى ءسوندىرۋ جۇمىستارى اياقتالعاننان كەيىن، ەكولوگيا مينيسترلىگى جانە توتەنشە جاعدايلار مينيسترلىگىمەن بىرلەسە وتىرىپ، مۇنداي جاعدايلاردىڭ الدىن الۋ بويىنشا كەشەندى جوسپار ازىرلەنىپ، قابىلدانادى»، — دەدى اكىم.
وبلىس اكىمى ءورتتى سوندىرۋگە قاتىسقان بارلىق ماماندارعا العىسىن ءبىلدىردى:
«قۇرمەتتى جەرلەستەر، ۋاقىتپەن ساناسپاي، وسى كۇردەلى ءارى ماڭىزدى جۇمىستى اتقارىپ جاتقان بارلىق قىزمەتكەرلەرگە شىن جۇرەكتەن العىسىمدى بىلدىرەمىن. بۇل – كاسىبيلىك پەن تاباندىلىقتى تالاپ ەتەتىن ناعىز كوماندالىق جۇمىس».
«سونداي-اق وسى قيىن كەزەڭدە سابىرلىق، قولداۋ جانە تۇسىنىستىك تانىتقان وبلىس تۇرعىندارىنا ەرەكشە العىسىمدى بىلدىرەمىن»، — دەپ تۇيىندەدى سەرىك شاپكەنوۆ.
