اقتاۋ گارنيزونىندا قورعانىس ءمينيسترىنىڭ ءبىرىنشى ورىنباسارى - باس شتاب باستىعى گەنەرال-لەيتەنانت قانىش ابۋباكىروۆ اسكەري-تەڭىز كۇشتەرىنىڭ جاۋىنگەرلىك، تەحنيكالىق جانە جەدەل ازىرلىگىن جان-جاقتى تەكسەردى، دەپ حابارلايدى «ادىرنا» ءتىلشىسى.
ءمينيستردىڭ ءبىرىنشى ورىنباسارى تەڭىزشىلەردىڭ قىزمەتىمەن جانە تۇرمىس جاعدايىمەن تانىسىپ، ولاردىڭ ماتەريالدىق-تەحنيكالىق قۇرالدارمەن قامتاماسىز ەتىلۋ دەڭگەيىن زەردەلەدى.
«ورال» زىمىران-ارتيللەريالىق كەمەسىندە گەنەرال-لەيتەنانت قانات ابۋباكىروۆ قارۋ-جاراق جۇيەلەرىنىڭ، ناۆيگاتسيا جانە راديوتەحنيكالىق جابدىقتاردىڭ دايىندىعىن تەكسەردى. وقۋ-جاتتىعۋ جيىنى بارىسىندا ەكيپاجدىڭ اتىس تاپسىرمالارىن ورىنداۋ كەزىندەگى ءىس-قيمىلى پىسىقتالىپ، جەكە قۇرامنىڭ ۇيلەسىمدىلىگىنە باعا بەردى.
سونىمەن قاتار باس شتاب باستىعى «قايسار» ديۆەرسياعا قارسى كاتەرى مەن ارنايى بولىمشەلەردىڭ كاسپي تەڭىزىنىڭ قازاقستاندىق اكۆاتورياسى مەن پورتتىق ايماقتارىن سۋ استى جانە سۋ ءۇستى قاتەرلەرىنەن قورعاۋعا ازىرلىگىن باقىلادى. ول قازاقستاننىڭ اسكەري-تەڭىز كۇشتەرى وڭىرلىك تۇراقتىلىقتى ساقتاۋدا شەشۋشى ءرول اتقاراتىنىن، سوندىقتان ولاردى جاڭعىرتۋ قورعانىس ۆەدومستۆوسىنىڭ باسىم باعىتتارىنىڭ ءبىرى بولىپ قالا بەرەتىنىن اتاپ ءوتتى.
ينسپەكتسيا قورىتىندىسى بويىنشا قورعانىس ءمينيسترىنىڭ ءبىرىنشى ورىنباسارى گەنەرال-لەيتەنانت قانىش ابۋباكىروۆ جاۋىنگەرلىك دايارلىقتى جەتىلدىرۋگە جانە بولىمشەلەردىڭ ۇيلەسىمدىلىگىن نىعايتۋعا باعىتتالعان ناقتى تاپسىرمالار بەردى.
