توقاەۆ تاياۋ شىعىستاعى قاقتىعىسقا قاتىستى مالىمدەمە جاساپ، كەلىسسوزدەرگە شاقىردى، دەپ حابارلايدى "ادىرنا" ۇلتتىق پورتالى.
بۇل تۋرالى پرەزيدەنت تۇركىستان وبلىسىنىڭ جۇرتشىلىعىمەن كەزدەسۋ بارىسىندا مالىمدەگەن.
مەملەكەت باسشىسىنىڭ ايتۋىنشا، سوڭعى جىلدارى الەمدەگى گەوساياسي احۋال كۇردەلەنىپ، ءتۇرلى ايماقتاردا قارۋلى قاقتىعىستار مەن سوعىستار كوبەيگەن. بۇل جاعداي جاھاندىق ەكونوميكاعا كەرى اسەرىن تيگىزىپ وتىر.
"سوعىس ابدەن شيەلەنىسىپ كەتتى. مەنىڭشە، بۇل قاقتىعىستا ەشبىر مەملەكەت تۇپكىلىكتى پايداعا قول جەتكىزە المايدى", — دەدى مەملەكەت باسشىسى.
پرەزيدەنت قاسىم-جومارت توقاەۆ قازاقستاننىڭ قاقتىعىس ايماعىنا جاقىن وڭىردە ورنالاسقانىن اتاپ ءوتىپ، ەلدىڭ بەيبىت ۇستانىمدى قولدايتىنىن جەتكىزدى. ونىڭ سوزىنشە، قازاقستان دانەكەر بولۋعا ۇمتىلمايدى، الايدا بەيبىت كەلىسسوزدەر وتكىزۋ ءۇشىن ءوز اۋماعىن ۇسىنۋعا دايىن.
"سوندىقتان وسى قاستەرلى جەردەن بارلىق ەلدەرگە حالىقارالىق قاۋىمداستىققا ۇندەۋ جاساعىم كەلەدى. ەڭ الدىمەن، ازاماتتىق، ەكونوميكالىق نىساندارعا قارۋلى شابۋىلداردى توقتاتۋ كەرەك. سودان سوڭ كەلىسسوزدەردى باستاۋ كەرەك. قازاقستان بۇل كۇردەلى احۋالدا دانەكەر بولعىسى كەلمەيدى، بىراق، ءوزىمىزدىڭ جەرىمىزدى بەيبىت كەلىسسوزدەر ءۇشىن ۇسىنۋعا دايىنبىز. مەنىڭشە، تۇركىستاندا وسىنداي كەلىسسوزدەر وتكىزۋگە بولار ەدى. الايدا، بۇل ماسەلە قاقتىعىسقا تىكەلەي قاتىسىپ وتىرعان مەملەكەتتەرگە بايلانىستى. ەڭ الدىمەن ولار وڭ شەشىم قابىلداۋى كەرەك. ال مەنىڭ ۇسىنىسىم بۇل — قازاق حالقىنىڭ ىزگى نيەتىنىڭ كورىنىسى. ابدەن كەش بولماي تۇرعاندا قارۋلى ءىس-ارەكەتتەردى دوعارىپ، كەلىسسوزدەردى باستاۋ قاجەت سياقتى، ايتپەسە، الەمدىك ەكونوميكانىڭ داعدارىسقا ۇشىراۋىن ايتپاعاندا، كوپتەگەن حالىقتىڭ بەيبىت ءومىرى، تىنىشتىعى بۇزىلادى، دۇنيە جۇزىندەگى تۇراقتىلىقتىڭ تۇعىرى شايقالادى", — دەدى پرەزيدەنت.
مەملەكەت باسشىسى قارۋلى ارەكەتتەردى توقتاتىپ، كەلىسسوزدەرگە كوشۋ قاجەت ەكەنىن اتاپ ءوتىپ، كەرى جاعدايدا الەمدىك تۇراقتىلىققا قاۋىپ تونەتىنىن ەسكەرتتى.
