ۋكراينانىڭ تاۋەلسىز شىركەۋىنىڭ نەگىزىن قالاۋشى فيلارەت (ميحايل دەنيسەنكو) 98 جاسىندا قايتىس بولدى. رەسمي مالىمەتكە سايكەس، ول جۇما كۇنى تاڭەرتەڭ دۇنيەدەن وتكەن، دەپ حابارلايدى “ادىرنا” پورتالى ۆۆس-گە سىلتەپ.
شىركەۋ مالىمدەمەسىندە فيلارەتتىڭ ۋكرايناداعى ءدىني ومىرگە قوسقان ۇلەسى ەرەكشە اتاپ ءوتىلدى. ول كەڭەستىك كەزەڭدەگى دىنگە قىسىم جىلدارىندا شىركەۋ قىزمەتىن ساقتاۋعا، تاۋەلسىزدىك كەزەڭىندەگى رۋحاني جاڭعىرۋعا جانە ۋكراين پراۆوسلاۆ شىركەۋىنىڭ تاۋەلسىزدىگى ءۇشىن كۇرەسكە بەلسەندى قاتىسقان.
فيلارەت ءار كەزەڭدە ءارتۇرلى قىزمەت اتقاردى. ول اۋەلدە رەسەي پراۆوسلاۆ شىركەۋى قۇرامىنداعى جوعارى لاۋازىمدى يەرارحتاردىڭ ءبىرى بولدى، كەيىن ۋكرايناداعى تاۋەلسىز شىركەۋ قوزعالىسىنىڭ كوشباسشىلارىنىڭ بىرىنە اينالدى.
2019 جىلى ۆارفولومەي ۋكرايناداعى جاڭا پراۆوسلاۆ شىركەۋىنە اۆتوكەفاليا تۋرالى قۇجات (توموس) تابىستاعاننان كەيىن، فيلارەت قۇرمەتتى پاتريارح مارتەبەسىن العان ەدى.
سوڭعى جىلدارى ول ۋكراينانىڭ پراۆوسلاۆ شىركەۋىمەن كوزقاراس قايشىلىعىنا ءتۇسىپ، ءوز باعىتىن ۇستانعان. سوعان قاراماستان، ونىڭ ەسىمى ۋكرايناداعى شىركەۋ تاۋەلسىزدىگى جولىنداعى كۇرەسپەن تىعىز بايلانىستى بولىپ قالا بەرەدى.
