Foto: dimashnews.com
Älemge tanymal qazaqstandyq änşı Dimaş Qūdaibergennıŋ bastamasymen jäne prodiuserlık qoldauymen jüzege asyp jatqan «Voice Beyond Horizon» muzykalyq jobasy özınıŋ alǧaşqy kezeŋınıŋ jartysyn eŋserdı. On ekı bölımnen tūratyn teleşoudyŋ altauy efirge şyǧyp ülgerdı, dep habarlaidy "Adyrna".
Būǧan deiın baǧdarlama Türkıstan oblysy men Maŋǧystau oblysy öŋırlerın halyqaralyq auditoriiaǧa tanystyrsa, endıgı baǧyt Almaty qalasyna auysty.
Joba körermen qyzyǧuşylyǧyn tek käsıbi deŋgeidegı vokaldyq öner arqyly ǧana emes, är şyǧarylym saiyn saqtalatyn intriga men erekşe format arqyly ūstap otyr. Sonymen qatar, Qazaqstannyŋ tabiǧi ärı tarihi körıktı oryndarynda ötken tüsırılımder de baǧdarlamanyŋ tartymdylyǧyn arttyra tüsken.
Televiziialyq reitingter boiynşa joba qatarynan alty ret köş bastap, tūraqty auditoriia qalyptastyra aldy. Jobanyŋ bas rejisserı Lo Sinsin jaŋa formattyŋ basty erekşelıgıne toqtalyp, dästürlı «daiyndyq – jarys – ırıkteu» jüiesınen özgeşe baǧyt taŋdalǧanyn atap öttı. Onyŋ aituynşa, būl jobada qatysuşylar men prodiuserler mädeni-tanymdyq zertteuler barysynda alǧan äserlerın şyǧarmaşylyqqa ainaldyrady. Osy arqyly aldyn ala daiyndalǧan qoiylymnan görı, türlı mädenietter arasyndaǧy şynaiy improvizasiialyq dialog ūsynylady.
Sonymen qatar, joba halyqaralyq yntymaqtastyqtyŋ jaŋa modelın körsetıp otyr. Rejisser «şeteldık investisiialar, qytailyq öndırıs jäne jahandyq almasu» qaǧidatyna negızdelgen būl täsıl mädeni bailanysty jaŋa deŋgeige köteretının aitty.
Hunan TV mälımetınşe, «Voice Beyond Horizon» jobasy Mango TV ūsynǧan «lokalizasiialanǧan bırlesken şyǧarmaşylyq» baǧytyndaǧy maŋyzdy jobalardyŋ qataryna engen. Aldaǧy uaqytta baǧdarlama geografiiasyn Qyrǧyzstan, Özbekstan jäne Ortalyq Aziianyŋ özge elderıne keŋeitu josparlanuda. Būl bastama Jıbek joly boiyndaǧy elder arasyndaǧy mädeni bailanysty nyǧaituǧa baǧyttalǧan.
İnternet keŋıstıgınde jobaǧa qatysty 200-den astam trendtık taqyryp tırkelıp, onyŋ keŋ auditoriiaǧa äserı aiqyn baiqaldy.
Tüsırılım jūmystary da auqymdy kölemde ūiymdastyrylǧan. 22 künge sozylǧan prosess barysynda Qazaqstannyŋ bırneşe qalasy men öŋırlerındegı tabiǧi jäne tarihi nysandar qamtyldy. Negızgı şyǧarmaşylyq toppen qatar, qosymşa jüzden astam maman logistika men ūiymdastyru jūmystaryn qamtamasyz etken.
Äsırese, erekşe lokasiialarda - köl ortasyndaǧy aralda, Kaspii teŋızı jaǧalauynda jäne qarly tauly aimaqtarda - sahnalyq alaŋdar qūru men dybystyq sapany saqtau negızgı mındetterdıŋ bırı boldy. Būl üşın arnaiy tehnikalyq şeşımder men tötenşe jaǧdailarǧa arnalǧan josparlar äzırlengen.
Joba barysynda mädeni aiyrmaşylyqtardy eskeru, köptıldı ortada jūmys ısteu jäne jergılıktı dästürlerdı saqtau da basty nazarda boldy. Nätijesınde, baǧdarlama körermenge tek vizualdy mazmūn emes, mädeniettı tereŋ sezınuge mümkındık beretın önım retınde ūsynyldy.
Būl joba türlı elderdıŋ resmi qūrylymdarynyŋ da qyzyǧuşylyǧyn tudyrdy. Qytaidyŋ Qazaqstan, Malaiziia, İtaliia, Qyrǧyzstan jäne Serbiiadaǧy elşılıkterı baǧdarlamany özderınıŋ resmi platformalarynda bırneşe ret jariialap, «erekşe ūsynylatyn kontent» retınde tanystyrdy. Qazaqstannyŋ Qytaidaǧy elşılıgı de jobany qoldap, aqparattyq materialdar taratqan.
Sonymen qatar, Qazaqstan Prezidentı Qasym-Jomart Toqaev jobaǧa qūttyqtau hat joldap, onyŋ ekı el arasyndaǧy mädeni jäne dostyq bailanystardy nyǧaitudaǧy maŋyzyn atap öttı.
