Фото: dimashnews.com
Әлемге танымал қазақстандық әнші Димаш Құдайбергеннің бастамасымен және продюсерлік қолдауымен жүзеге асып жатқан «Voice Beyond Horizon» музыкалық жобасы өзінің алғашқы кезеңінің жартысын еңсерді. Он екі бөлімнен тұратын телешоудың алтауы эфирге шығып үлгерді, деп хабарлайды "Адырна".
Бұған дейін бағдарлама Түркістан облысы мен Маңғыстау облысы өңірлерін халықаралық аудиторияға таныстырса, ендігі бағыт Алматы қаласына ауысты.
Жоба көрермен қызығушылығын тек кәсіби деңгейдегі вокалдық өнер арқылы ғана емес, әр шығарылым сайын сақталатын интрига мен ерекше формат арқылы ұстап отыр. Сонымен қатар, Қазақстанның табиғи әрі тарихи көрікті орындарында өткен түсірілімдер де бағдарламаның тартымдылығын арттыра түскен.
Телевизиялық рейтингтер бойынша жоба қатарынан алты рет көш бастап, тұрақты аудитория қалыптастыра алды. Жобаның бас режиссері Ло Синьсин жаңа форматтың басты ерекшелігіне тоқталып, дәстүрлі «дайындық – жарыс – іріктеу» жүйесінен өзгеше бағыт таңдалғанын атап өтті. Оның айтуынша, бұл жобада қатысушылар мен продюсерлер мәдени-танымдық зерттеулер барысында алған әсерлерін шығармашылыққа айналдырады. Осы арқылы алдын ала дайындалған қойылымнан гөрі, түрлі мәдениеттер арасындағы шынайы импровизациялық диалог ұсынылады.
Сонымен қатар, жоба халықаралық ынтымақтастықтың жаңа моделін көрсетіп отыр. Режиссер «шетелдік инвестициялар, қытайлық өндіріс және жаһандық алмасу» қағидатына негізделген бұл тәсіл мәдени байланысты жаңа деңгейге көтеретінін айтты.
Hunan TV мәліметінше, «Voice Beyond Horizon» жобасы Mango TV ұсынған «локализацияланған бірлескен шығармашылық» бағытындағы маңызды жобалардың қатарына енген. Алдағы уақытта бағдарлама географиясын Қырғызстан, Өзбекстан және Орталық Азияның өзге елдеріне кеңейту жоспарлануда. Бұл бастама Жібек жолы бойындағы елдер арасындағы мәдени байланысты нығайтуға бағытталған.
Интернет кеңістігінде жобаға қатысты 200-ден астам трендтік тақырып тіркеліп, оның кең аудиторияға әсері айқын байқалды.
Түсірілім жұмыстары да ауқымды көлемде ұйымдастырылған. 22 күнге созылған процесс барысында Қазақстанның бірнеше қаласы мен өңірлеріндегі табиғи және тарихи нысандар қамтылды. Негізгі шығармашылық топпен қатар, қосымша жүзден астам маман логистика мен ұйымдастыру жұмыстарын қамтамасыз еткен.
Әсіресе, ерекше локацияларда - көл ортасындағы аралда, Каспий теңізі жағалауында және қарлы таулы аймақтарда - сахналық алаңдар құру мен дыбыстық сапаны сақтау негізгі міндеттердің бірі болды. Бұл үшін арнайы техникалық шешімдер мен төтенше жағдайларға арналған жоспарлар әзірленген.
Жоба барысында мәдени айырмашылықтарды ескеру, көптілді ортада жұмыс істеу және жергілікті дәстүрлерді сақтау да басты назарда болды. Нәтижесінде, бағдарлама көрерменге тек визуалды мазмұн емес, мәдениетті терең сезінуге мүмкіндік беретін өнім ретінде ұсынылды.
Бұл жоба түрлі елдердің ресми құрылымдарының да қызығушылығын тудырды. Қытайдың Қазақстан, Малайзия, Италия, Қырғызстан және Сербиядағы елшіліктері бағдарламаны өздерінің ресми платформаларында бірнеше рет жариялап, «ерекше ұсынылатын контент» ретінде таныстырды. Қазақстанның Қытайдағы елшілігі де жобаны қолдап, ақпараттық материалдар таратқан.
Сонымен қатар, Қазақстан Президенті Қасым-Жомарт Тоқаев жобаға құттықтау хат жолдап, оның екі ел арасындағы мәдени және достық байланыстарды нығайтудағы маңызын атап өтті.
