قوسشى قالاسىندا قازاقستان ساز اسپاپتارى شەبەرلەرىنىڭ بىرلەستىگى رەسمي تۇردە قۇرىلىپ، العاشقى قۇرىلتاي جيىنى ءوتتى، دەپ حابارلايدى "ادىرنا" ۇلتتىق پورتالى.
بۇل تۋرالى دارحان قىدىرالى ءوزىنىڭ الەۋمەتتىك جەلىدەگى پاراقشاسىندا حابارلادى.
ونىڭ ايتۋىنشا، بۇعان دەيىن مۋزىكالىق اسپاپ شەبەرلەرىنىڭ ارنايى بىرلەستىگى بولماعان.
«وتىز جىل بويى ورتاق جيىن وتپەگەنىن، ال كەيبىر شەبەرلەردىڭ قولونەرشىلەر بىرلەستىگىنە تىركەلىپ جۇرگەنىن ەستىگەندە تاڭ قالدىم. وسى ءىستىڭ باسى-قاسىندا جۇرگەن ايتىسكەر اقىن ەركەبۇلان باۋىرىمنان ءبىراز جايتقا قانىق بولدىق. شەشىمىن كۇتىپ تۇرعان ماسەلەلەر دە از ەمەس ەكەن. ول تۋرالى دەپۋتاتتىق ساۋالىمىزدا ايتتىق»، — دەدى ول.
قۇرىلتاي جيىنىندا باسقارما توراعاسى، مۇشەلەرى مەن اقىلداستار القاسى سايلاندى. ەلىمىزدىڭ تۇكپىر-تۇكپىرىنەن جينالعان شەبەرلەر ءوزارا تاجىريبە الماسىپ، سالانىڭ وزەكتى ماسەلەلەرىن تالقىلادى. جيىندا جولاۋشى تۇردىعۇلوۆ، ناربەك وحانوۆ، سۇلتان مۇساەۆ، باقىتجان ءدىلمانوۆ، بابىر ارعىنوۆ سياقتى بەلگىلى شەبەرلەر ءسوز سويلەدى. ال كۇيشى جانعالي ءجۇزباي باستاعان مادەنيەت مايتالماندارى جاڭا بىرلەستىكتىڭ قۇرىلۋىن قۋانا قارسى الىپ، تابىس تىلەدى.
بۇگىندە ەلىمىزدە 300-دەن 500-گە دەيىن مۋزىكالىق اسپاپ شەبەرى بار ەكەن. سوندىقتان جاڭا بىرلەستىكتىڭ جۇمىسى تەز جاندانادى دەگەن ءۇمىت بار.
جيىنعا باكۋدەگى “تۇركى مادەنيەتى مەن مۇراسى” قورىنىڭ باسشىسى اقتوتى رايىمقۇلوۆا ارنايى قۇتتىقتاۋ حات جولداعان. قاراشا ايىندا وسى باعىتتا ءىرى كونفەرەنتسيا وتكىزۋ جوسپارلانىپ وتىر.
جيىنعا ارنايى قاتىسقان ءماجىلىس دەپۋتاتى اسحات ايماعامبەتوۆ شەبەرلەردى زاڭنامالىق تۇرعىدا قولداۋ قاجەتتىگىن اتاپ ءوتتى. ال ماقسات تولىقباي سالا بويىنشا قولعا الىنعان ناقتى باستامالار تۋرالى بايانداپ، جاڭا بىرلەستىك مۇشەلەرىنە ساتتىلىك تىلەدى.
«بىرلەسىپ، بەرەكەلى ءىستى قولعا العان شەبەرلەرگە تابىس تىلەيمىز. بۇل – ۇلتتىق مادەنيەتىمىزدى جاڭعىرتۋ جولىنداعى ماڭىزدى قادام»، — دەدى دەپۋتات.
