Qazaqstanda belgı taǧylǧan alǧaşqy qara qūmai Ündıstanda ölı tabylǧany turaly aqparat tarady, dep habarlaidy "Adyrna" ūlttyq portaly.
Mälımetke säikes, jyrtqyş qūstardyŋ köşı-qon baǧyttaryn baqylauǧa arnalǧan halyqaralyq baǧdarlama aiasynda Qazaqstanda belgı taǧylǧan jas qara qūmai qysqy mausymda Ündıstannyŋ Radjasthan ştatyna ūşyp barǧan. Qūs Djodhpur qalasyna qarasty Djudiia auylynda josparly dalalyq tekseru kezınde ölı küiınde tabylǧan.
Qara qūmaiǧa sputniktık maiak 2024 jylǧy 24 şıldede ornatylǧan. Būl qūrylǧy Ortalyq Aziia men Ündı subkontinentı arasyndaǧy alys köşı-qon baǧyttaryn baqylau maqsatynda taǧylǧan. Qūs osy baǧyt boiynşa ekı ret ūşyp baryp, qaita oralǧan. Alaida üşınşı qysqy sapary kezınde qaza tapqan.
Tabiǧatty qorǧauşylardyŋ aldyn ala boljamynşa, jyrtqyş qūs auyl şaruaşylyǧy januarynyŋ öleksesın jep, ulanyp ölgen boluy mümkın. Mamandardyŋ aituynşa, malǧa öler aldynda tyiym salynǧan veterinarlyq auyrsynudy basatyn därı salynǧan boluy yqtimal. Mūndai preparattar Oŋtüstık Aziiada qūmailardyŋ jappai qyryluyna sebep bolatyn negızgı qauıpterdıŋ bırı sanalady.
Tekseru barysynda tabiǧat qorǧauşylary qūstyŋ jeke basyn rastaityn säikestendıru saqinasyn tapqan. Alaida sputniktık maiak tabylmaǧan. Mamandardyŋ aituynşa, qūs şamamen bır apta būryn ölgen boluy mümkın, al onyŋ denesı qatty ydyrap ketken. Qaldyqtarynyŋ basym bölıgın jabaiy januarlar jep qoiǧan.
