بيىل باياناۋىل اۋدانى ءۇشىن تابىستى جىل بولدى. وڭىرگە قاراستى ەلدىمەكەندەردە مادەنيەت ۇيلەرى مەن مەديتسينالىق بولىمشەلەر كۇردەلى جوندەۋدەن ءوتتى. بۇل — «اۋىل – ەل بەسىگى» باعدارلاماسىنىڭ يگىلىگى.
پاۆلودار وبلىسىنا قاراستى باياناۋىل اۋدانى اكىمدىگىنىڭ مالىمەتىنشە، قانىش ساتباەۆ اۋىلدىق مادەنيەت ءۇيى كۇردەلى جوڭدەۋدەن وتۋدە. جەرگىلىكتى مەكتەپتىڭ سىرتقى قاسبەتى، قورشاۋى جاڭارتىلىپ، اباتتاندىرۋ جۇمىستارى جۇرگىزىلدى. سىرتقى قابىرعاسىنا اكادەميك قانىش ساتباەۆتىڭ سۋرەتى بار مۋرال سالىندى.
- قانىش ساتباەۆ اۋىلىنىڭ كوشە جارىعىنىڭ قۇرىلىسى تولىعىمەن اياقتالىپ، تۇنگى اۋىل ءىشى جارقىراپ جانىپ تۇر. اۋىلىشىلىك جولداردى ورتاشا جوڭدەۋ جوباسى بويىنشا كىرەبەرىس جانە 4 كوشەنىڭ جولىن اسفالتتاۋ قولعا الىنعان بولاتىن. كۇننىڭ كۇرت سۋىنا بايلانىستى بۇل جۇمىس ازىرگە توقتاتىلدى. دەگەنمەن، جىلاندى كوشەسى، 1 قيىلىس جانە كىرەبەرىس جولعا اسفالت سالىنىپ ۇلگەردى، - دەدى اكىمدىكتە.
ال، مايكوبە اۋىلىنداعى مەديتسينالىق پۋنكتكە كۇردەلى جوندەۋدەن ءوتتى. بۇل ماقساتقا 10,1 ملن تەڭگە قاراجات جۇمسالعان.
اۋىلدا 140 ادام تۇرادى. دارىگەر-تەراپەۆت تاراپىنان ايىنا ءبىر رەت قابىلداۋ جۇرگىزىلەدى. سونداي-اق، مەدبيكە كۇن سايىن تۇرعىنداردى قابىلداۋ جانە تەكسەرۋ، بالالار مەن جۇكتى ايەلدەردى پاتروناجداۋ، ديسپانسەرلىك ناۋقاستاردى باقىلاۋ جۇمىستارىن جۇرگىزەدى.
مەديتسينالىق پۋنكتتە دارىگەردىڭ قابىلداۋ كابينەتى جانە ەمشارا كابينەتى بار.
"ادىرنا" ۇلتتىق پورتالى
