يراننىڭ جاڭا جەتەكشىسى اياعىنان جارالاندى دەگەن اقپارات تاراۋدا

فوتو: Reza B/MEI/SIPA, Reza B/MEI/SIPA

يراننىڭ جاڭا جوعارعى جەتەكشىسى مودجتابا حامەنەي جارالانعان بولۋى مۇمكىن، سوندىقتان سايلانعاننان كەيىن ءالى بىردە-ءبىر رەت كوپشىلىك الدىندا كورىنبەدى. بۇل تۋرالى Reuters اگەنتتىگىنە جوعارى لاۋازىمدى يزرايلدىك شەنەۋنىك مالىمدەدى، دەپ حابارلايدى "ادىرنا" ۇلتتىق پورتالى DW سايتىنا سىلتەپ. 

ونىڭ ايتۋىنشا، اقش پەن ءيزرايلدىڭ بىرلەسكەن اۋە سوققىسى كەزىندە مودجتابا حامەنەي جەڭىل جاراقات العان.

dpa اگەنتتىگىنىڭ جازۋىنشا، 56 جاستاعى مودجتابا حامەنەي اكەسىنىڭ قازاسىنان كەيىن جوعارعى جەتەكشى قىزمەتىنە كەلگەن. ول 11 كۇن بۇرىن تەگەران ورتالىعىندا بولعان جارىلىستاردان امان قالعان. بۇل شابۋىلدار كەزىندە ونىڭ اكەسى عانا ەمەس، ايەلى، اناسى جانە كۇيەۋ بالاسى دا قازا تاپقان.

امەريكالىق The New York Times باسىلىمى ءۇش يراندىق شەنەۋنىككە سىلتەمە جاساپ، مودجتابا حامەنەي اياعىنان جاراقات العانىن حابارلايدى.

"قازىرگى تاڭدا يران ۇكىمەتىندە جاڭا جوعارعى جەتەكشى تۋرالى ناقتى اقپارات جوق، مينيسترلەر مەن پرەزيدەنت ماسۋد پەزەشكيان ونىمەن بايلانىسقا شىقپاعان", دەپ جازادى وپپوزيتسيالىق Iranwire پورتالى ءوز دەرەك كوزدەرىنە سىلتەمە جاساپ.

ءيزرايلدىڭ قورعانىس ءمينيسترى يسراەل كاتس بۇرىنعى سوزىندە قازىرگى يران باسشىلىعى تاعايىنداعان كەز كەلگەن جەتەكشى «ەش شارتسىز جويۋ نىسانىنا» اينالاتىنىن مالىمدەگەن.