الماتىدا “ناۋقاس” بالانىڭ ەمىنە اقشا جيناعان ەكى قىز ۇسالدى. بۇل تۋرالى Polisia.kz جاريالادى، دەپ حابارلايدى “ادىرنا” ۇلتتىق پورتالى.
22 جانە 23 جاستاعى قىزدار الەۋمەتتىك جەلى ارقىلى الاياقتىق جاسادى دەگەن كۇدىكپەن ۇستالدى. بارلىعى بەلگىلى بلوگەر، اكتريسا داريا الەكساندروۆانىڭ الاياقتىق تۋرالى اۋەزوۆ اۋداندىق پوليتسياسىنا ارىزدانۋىنان باستالدى.
ونىڭ ايتۋىنشا، ەكى بويجەتكەن ناۋقاس بالاعا كومەك سۇراي وتىرىپ، قولدان جاسالعان قۇجاتتاردى پايدالانىپ، پاراقشاسىنا پوست جاريالاۋعا كوندىرگەن. بلوگەردىڭ ۇلكەن اۋديتورياسى جاناشىرلىق تانىتىپ، كومەككە شاقىرۋدى نازاردان تىس قالدىرماي، بەلسەندى تۇردە قاراجات اۋدارا باستادى.
"قابىلدانعان شارالاردىڭ قورىتىندىسى بويىنشا وسى قىلمىسقا كۇدىكتىلەر انىقتالدى جانە ۇستالدى. ولار اقمولا وبلىسىنىڭ تۇرعىندارى. العاشقى جاۋاپ الۋدا قىزدار ءوز ءىس-ارەكەتتەرىن مويىندادى. اتالعان دەرەك بويىنشا تەرگەۋ امالدارى جۇرگىزىلۋدە", – دەدى اۋەزوۆ اۋداندىق پوليتسيا باسقارماسىنا قاراستى پوليتسيا ءبولىمى باستىعىنىڭ ورىنباسارى تيمۋر مۋلينوۆ.
كۇدىكتىلەردىڭ ءبىرى سپورتشى، تاەكۆاندومەن اينالىسقان. بۇرىن ونىڭ زاڭمەن ماسەلەلەرى بولعان جانە ۇرلىق ءۇشىن جاۋاپقا تارتىلعان. ونىڭ قۇربىسى س.ەسىمدى ازاماتشا – مانيكيۋر جاساۋ شەبەرى. قازىر تەرگەۋشىلەر بۇل دەرەكتەن باسقا دا ەپيزودتار بار-جوعىن انىقتاپ جاتىر.
”ادىرنا” ۇلتتىق پورتالى
